Sail Aruba 2015 ta recorda 200 aña Reino Hulandes y 350 aña Marina Real

ORANJESTAD- E celebracion Sali Aruba 2015 fin di e luna aki, ta pa netamente recorda 200 aña di Reino y 350 aña di existencia di Marina Real. Esaki a keda presenta pa e comision encarga di e evento, y subraya pa e director nobo di gabinete di gobernador, Rajen Budhu Lall, y comandante di Marinierskazerne, Jan ten Hove. Manera ta conoci, na 2013 Aruba tabatin e honor di tabatin e Pareha Real Rey Willem Alexander y Reina Maxima di bishita na Aruba. Den menos di dos aña nan tey atrobe pa ta parti di e evento Sail Aruba 2015. Nan ta aki riba invitacion di Gobernador di Aruba sr. Refunjol.

CELEBRACION DI PUEBLO

E aña aki Reino ta sigui cu celebracion di su di 200 aña di existencia y Marina Real ta existi 350 aña. Motibonan di sobra pa celebracionnan grandi na unda pueblo ta participa. Un di e celebracionnan aki ta tuma lugar na Aruba dia 1 di mei proximo unda Cuerpo di Marina Real ta hunga un rol grandi. E fecha 1 di mei a coincidi cu e ‘Open Dag’ di Marina Real y e festividadnan pa loke ta Sail Aruba Event, Un combinacion perfecto. Sali Aruba Event ta pa celebra 200 aña di existencia di Reino y 1 di Mei, e dia cu tradicionalmente Marina Real ta tene su actividadnan na Kazerne. E biaha aki e ‘Open Dag’ di 1 di Mei di Marina Real ta tuma lugar riba tereno di APA y den su becindario cu tur clase di animacion hinca den un programa espectacular.

MARINIERSKAZERNE

Comandante Ten Hove di MariniersKazerne Savaneta a splica cu 1 di Mei ta conoci tur rond Aruba pa ta e dia cu Marina ta tene su ‘Open Dag’ cu su acustumbrado feria y mercado di purga y sin laga afo e ‘gezelligheid’ cu e dia aki ta trece cu ne. Tambe e mariniernan ta haci nan demostracionnan pa mustra e pakico di nan presencia na Aruba. Ten Hove a bisa cu ora nan a puntre pa participa den sail Aruba el a bisa pa miho laga e evento tuma lugar dianan 1 y 2 di mei cu ta masha bentahoso pa tur hende, mirando cu 1 di mei ta un dia liber y 2 di mei ta cay riba un diasabra. “Kico ta mas bunita pa ta den e evento aki riba e dianan 1 y 2 di mei”? Ten Hove a sugeri pa haci e evento di Sail aki cada cinco aña. E ta un evento maritimo y nautico, di cual Marina Real ta un parti chikito di dje. “Pesey mes mi ta asina contento cu participacion di APA , pasobra mester ta cla cu esaki no ta un evento di Marina so.” Ten Hove a splica cu e evento Sail Aruba no ta di compara cu Sail Amsterdam, pero esey ta di menor importancia. E evento aki lo crece si keda haci ‘e cada 5 aña. “Ami lo percura pa esnan cu ta bin despues di mi tene e evento aki den mente y organis’e cada 5 aña. Mi ta spera cu dianan 1 y 2 di mei ta bay bin mas di 18 mil hende y eigenlijk mi ta mik riba 25 mil hende pa dia.” E comandante no kier pa e existencia di 350 aña di Marina Real domina e celebracion di Sail Aruba y 200 aña di Reino. ‘Dia 10 di december 2015 nos ta celebra e fecha importante aki.”