Despues di un poco retraso Embassy Suites by Hilton a ricibi su prome huesped na Aruba

PALM BEACH – Despues di hopi anticipacion, Hilton a habri e propiedad Embassy Suites by Hilton Aruba Resort y ricibi nan prome huespednan, e cadena ta raporta. Ta trata di e hotel di 330 camber situa entre Eagle Beach y Bubali Plas. E ta bira e prome   Embassy Suites na Aruba y e di dos Hilton Hotel riba e isla. E ta e hotel di mas nobo cu Aruba ta conoce.

RETRASO

Manera cu e portal aki a raporta anteriormente, tabata ya na 2017 cu ambientalistanan a mustra preocupacion pa cu e localidad di e hotel, ora cu a tende un vrum vrum di e hotel caba. Pero tabata te na 2019 cu oficialmente e propietarionan Venezolano a anuncia cu e hotel lo bin Aruba, e hotel a anuncia aña pasa februari cu na April di e mesun aña (2021) lo a cuminsa tuma reservacion ya cu e hotel tabata cla pa habri e tempo ey. Pero Covid19 a bruha tur cos y pesey awor ta na 2023 aki, e hotel finalmente a habri su portanan. 

PROYECTO MIYONARIO 

E proyecto hotelero di mas di 130 miyon dollar Mericano, for di aña 2016 caba a start cu preparacionnan y desde 2018 e trabounan di construccion a cuminsa, planea pa keda cla na 2021. Pero debi na pandemia y e medidanan di distanciamento social, a stroba e proyecto y a tuma por lo menos dos aña mas pa por a keda cla. Awor e proyecto ta asina leu  e prome huespednan a yega Aruba, den forma di un “soft opening” mientras cu ta caba di finalisa tur detaye chikito.