Parlamento a pidi minister duna cuenta riba carta di CFT

ORANJESTAD – Minister Bermudez mester bin duna cuenta na Parlamento riba e carta cu e la ricibi di College Financieel Toezicht recientemente. Presidente di parlamento Marisol Lopez Tromp a confirma e bishita na NoticiaCla.com. E intencion ta pa e mandatario duna mas bien un comentario riba e carta cu e la haya y tambe kico e tin pensa di haci cu e recomendacionnan. E reunion ta poni pa tuma lugar dialuna awor 2’or y ta un asina yama ‘bijeenkomst’ cu lo wordo transmiti ‘live’.

CFT

Informacion cu NoticiaCla.com tin, ta cu e efecto y importancia di e reunion aki ta bay mas leu cu hopi hende ta kere. Sigur si tuma nota e.o. di e preguntanan specifico cu a sali di parlamentarionan di AVP pa cu e presupuesto proximo (2015), y su coneccion cu CFT (lesa e preguntanan aki) . E ponencia y pensamento ta cu si gobierno di Aruba no aplica e 4 medidanan cu CFT a propone den nan ultimo carta na minister, cu 1. Tin chens cu Aruba ta haya un Algemeen Maatregel van Rijksbestuur (den e caso aki, Hulanda ta tuma finanzas di pais Aruba over), 2. Gobernador un biaha mas no ta firma e presupuesto manera a sosode aña pasa. Cu esaki den pensamento, parlamento tin asina hopi interes pa sa kico gobierno ta bay haci, pa evita un scenario similar na aña pasa.

PREGUNTANAN AVP

Entre e preguntanan cu a wordo manda pa e.o. fraccion di AVP, por nota claramente e precupacion di e fraccion cu tin mayoria den parlamento. Entre nan, tin un pregunta cu ta bisa: “Si e medidanan proponi pa CFT no wordo aplica, Aruba lo haya un AMvRB?”. Tambe “Kico ta pasa cu gobierno di Aruba si e haya un AMvRB?”. Y finalmente “Ki funcion parlamento lo haya, (si Aruba haya un AMvRB”. Tur esakinan ta preguntanan cu ta indicativo cu tin un precupacion den parlamento mes, cu e situacion no ta mustra bon y cu kier un claridad riba e asunto mas pronto cu ta posibel. Pesey fuentenan fidedigno di NoticiaCla.com a mustra cu e reunion di dialuna por tin su debido importancia, pasobra e por ta determinante pa e proximo pasonan cu lo bin for di Hulanda pa cu e presupuesto 2015. (lesa aki kico un Algemeen Maatregel van (Rijks)Bestuur ‘AMvRB’ ta)