Gobierno tin problema cu dividend y winstbelasting

ORANJESTAD – Gobierno (lesa Departamento di impuesto) tin problema cu winstbelasting y dividend belasting. Dos tipo di belasting cu nan no por genera entrada manera pronostica. Esey ta nifica cu nan lo tin cu bay aplica medida mas estricto pa por logra genera e entradanan cu ta riba caya pa logra nan meta di 2014. Esaki ta resalta di e informacion cu e director a suministra na gobierno di Aruba dialuna ultimo, den cuadro di e investigacion di e presupuesto.

Den e carta pa gobierno, nan ta confirma cu nan a genera ‘apenas’ 43% di e cantidad cu nan a pronostica cu ta 160,90 miyon florin. Te cu fin di juli nan a genera ‘solamente’ 68.9 miyon cu ta 43% di e totalidad. Ainda falta 92 miyon pa december di e aña aki. Motibo di e suma aki ta cu e asina yama ‘voorlopige aanslagen’ a sali laat, na maart di e aña aki, cu ta pone cu e comienso di e aña aki, suma di winstbelasting a resulta malo. E problema ta cu e entrada ta basa riba ‘aanslagen’ halto di e añanan anterior.

Loke ta interesante ta e hecho cu ta resulta cu un solo persona of instancia debe gobierno 20 miyon na winstbelasting, y cu tin negoshacionnan andando pa e persona of instancia aki paga e suma aki mesora.

Un otro parti cu tin problema ta dividend belasting. A pronostica cu lo mester genera e suma di 6 miyon e anja aki, pero te na final di juni 2014, servicio di impuesto a logra genera solamente 1.5 miyon florin cu ta apenas 26%. Ainda falta 4.5 miyon na dividend belasting. Otro entradanan si ta bayendo segun planificacion. Na tur gobierno ta planea pa genera 636.70 miyon florin, di cual gobierno a ricibi 326.8 miyon florin.