ORANJESTAD- Recientemente, durante dos diferente control di Aduana, ambtenaren a constata carganan ilegal. E prome carga confisca a tuma luga riba 18 januari 2023. E carga a contene un gran cantidad di caha di webo empaketa den caha di appel cu no wordo declara. Ta trata di webo blanco cu mester di permiso di importacion for di Directie Economische Zaken, Handel en Industrie (DEZHI).
E di dos carga confisca a tuma luga riba 1 februari 2023. E carga a contene un gran cantidad di diferente tipo di medicamento cual tabata scondi den un container di fruta. Ta trata aki di medicamentonan manera diclofenac, diferente tipo di antibiotica, dolocom, sildenafil, ampicilina, fricilicont, diclofec forte, amoxilina, gripefin, mambo y hopi mas. E carga no a wordo declara y tampoco tabata tin permiso di importacion for di Inspectie Volksgezondheid Aruba (IVA). Aduana a confisca e carganan aki y a pasa e casonan pa seccion di Recherche y Informacion (DRI).
DAA ta percura pa cumpli cu su tareanan fiscal como tambe e tareanan no-fiscal. Den e caso aki riba e tereno di salubridad, ta importante pa preveni carganan ilegal sali den mercado liber y alabes ta proteha e salud di e comunidad di Aruba.
ORANJESTAD - Un grupo di persona dialuna mainta durante e ceremonia protocolario relaciona cu Himno y Bandera, a dicidi di protesta cu pancarta dilanti e gobernantenan presente. Riba e pancartanan tabatin varios lema, variando di temanan economico pa tema di medio ambiente. Autoridad presente a haya nan mes ta pone ordo pa evita cualkier problema.
ORANJESTAD - Awe cu e proyecto di Aruba Doet, Gobernador di Aruba Alfonso Boekhoudt tabata na Noord pa yuda cu e proyecto di Ban Lanta y Planta, caminda e la planta matanan di Aruba. Un bunita proyecto cu lo crea un impacto significativo.Awe ta inicia e dos dianan di e acto di Aruba Doet unda cu miles di voluntario ta participa den un of otro proyecto pa drecha esaki na bienestar di nos comunidad. Mayan tambe tin e proyecto aki.
ORANJESTAD – Departamento di Impuesto ta informa cu dia 2 di april 2024 ta ultimo dia pa entrega e lista colectivo di salario (verzamelloonstaat of VZL) y e lista colectivo di pago na tercera persona (verzamelstaat opgaaf derden of VOD) di aña 2023. Tur doño di trabou of comerciante mester entrega e listanan menciona den forma digital via e portal ‘BO impuesto’ (BOi) di Departamento di Impuesto.
ORANJESTAD - Den un esfuerso pa reforsa desaroyo turistico sostenibel di e isla, A.T.A. a lansa un encuesta cu ta enfoca riba e sentimento local encuanto turismo na Aruba. Esaki ta bira e di tres encuesta similar cu A.T.A. ta lansa, e prome encuesta a tuma lugar na aña 2018 prome cu e pandemia, y un biaha mas na aña 2022 cu ta despues di e pandemia. E informacion y resultadonan ta sirbi como un base pa forma e strategia di A.T.A., y por fungi como un conseho na diferente socionan. Pa actualisa e estudio aki, A.T.A. ta realisa e siguiente ‘Local Sentiment Survey’ pa midi e sentimento local den 2024.