Clausura di weganan interinsular ta na Corsou

ORANJESTAD -  Fin di siman nos dilanti, dianan 17 pa 19 di april 2015 ta tuma lugar na Corsou e clausura di ‘Weganan Interinsular’ pa e aña aki. E delegacion di Aruba ta sali diabierna merdia cu Insel Air. Como hefe di delegacion ta biaha pa IBiSA sra. Jacqueline Ponson van Putten hunto cu coordinadornan Edward Robles y Mildred Wever. Durante fin di siman tin competencia den e deportenan di volleybal y futbol pa mucha muher. E weganan di volleybal ta riba nivel di Enseñansa Avansa y Aruba ta wordo representa pa su team campeon di e competencia escolar, esta Colegio San Nicolas. E competencia di futbol ta riba nivel di Enseñansa Basico y e campeon escolar ta representa Aruba, cu ta e team di mucha muher di International School of Aruba.

IBiSA ta pidi pa tur esnan cu ta forma parti di e delegacion cu ta biaha pa Corsou, pa nan ta no mas tarda cu 9’or di mainta na aeropuerto pa regla tur rekisito di e biahe, mirando cu ta biaha den grupo. E buelo di Insel Air ta sali pa 12:05 p.m. diabierna merdia. Na Corsou, e delegacion di Aruba ta hospeda na hotel Trupial Inn. Mientras cu regreso di e delegacion ta riba diadomingo 19 di april 2015 pa 7:30 p.m.