Crecemento den capacidad y trafico aereo na aeropuerto

ORANJESTAD - “E lunanan nos dilanti ta mustrando miho di locual nos a pronostica”, asina Jo-Anne Arends, Head Airline Marketing na Aruba Airport Authority a anuncia. E cifranan aki no ta bini di suerte, sino como consecuencia di trabao duro y intensivo den ekipo, forma no solamente pa e departamento di mercadeo di aerolinea na Aeropuerto, pero tambe cu ehecutivonan di Ministerio di Turismo, Aruba Tourism Authority, Departamento di Aviacion Civil y AHATA.

AAA

Aruba Airport Authority ta premira crecemento den airlift for di dia 1 di april te cu dia 31 di october 2015. Merca ta mustra un crecemento di 13%, pues durante di lunanan di zomer 2015 tin un total di 60.466 stoel adicional disponibel riba vuelonan pa Aruba. Canada ta mustra un aumento leve, esta di 3% y tin 478 stoel mas disponibel. Europa tin 1.218 stoel adicional disponibel, cu ta un crecemento di 3% den capacidad, compara cu e mesun periodo den 2014. E crecemento di capacidad di stoel disponibel for di destinacionnan Latino Americano ta sigui crece significante, esta cu 18%, pa un total di 50.503 stoel adicional.

SOUTHWEST AIRLINES

E aumento grandi di e cantidad di stoelnan disponibel pa bishitantenan yega Aruba ta depende di diferente factor. E aerolinea Southwest Airlines, cu ta e mas grandi pa loke ta trata vuelonan domestico (den Merca), cu a expande pa ofrece vuelonan pa destinacionnan pafo di Merca, for di cual Aruba tabata e prome, ta haciendo un contribucion significante. E aerolinea su conexionnan ta excelente den Merca y consecuentemente Aruba ta gosa di e beneficio di tin mas ciudad cu ta conecta cu nos isla, por ehempel via di Orlando y Baltimore

UNITED AIRLINES

United Airlines a tuma un decision cu a bin como un sorpresa grato pa Aruba. E aerolinea a anuncia cu e ta ofreciendo mas cupo for di tur su “gatewaynan” pa Aruba durante di zomer. Tambe e aerolinea a lansa e vuelo di diasabra for di Houston di nobo y lo mantene esaki durante di henter zomer 2015. Ademas nan a hisa e cantidad di vuelo for di Washington D.C. y lo tin vuelonan diario te cu dia 23 di april 2015 y tambe for di Chicago durante di lunanan mas importante pa e aerolinea. United a añadi tambe mas capacidad pa Newark, cu ta wordo aplica te cu dia 30 di mei 2015.

AMERICAN AIRLINES

American Airlines tambe ta haciendo un contribucion grandi cu un cantidad di vuelo extra, incluyendo un di tres vuelo diario, ya introduci for di dia 6 di november 2014, cu lo sigui durante di henter zomer, cu excepcion di e periodo di 6 di april pa 31 di mei riba Diaranson y Diahuebs. Insel Air Aruba ta mantene 5 vuelo semanal pa Miami. Importante pa añadi ta cu Insel Air Aruba awor ta conta cu pre-cleared flights tur dia pa Miami.

LATINO AMERICA

Latino America, e di dos mercado mas importante pa Aruba lo aumenta cu 12%, compara cu e zomer anterior, segun cifranan di Aruba Airport Authority. Aruba Airlines y Insel Air ta ofreciendo vuelonan for di Maracaibo y Valencia y asina ta compensa pa e capacidad cu a bay perdi. Panama ta sigui un di e gatewaynan mas fuerte for di Latino America pa Aruba. For di e pais aki Aruba ta nota un aumento di 11% den capacidad. Esaki ta debi na e actividadnan di Aruba Airlines, cual ta conecta Venezuela cu Panama pa medio di Aruba como un hub. Copa Airlines tambe a aumenta su vuelonan for di 7 pa 10 semanal.