Minister di Salubridad di Aruba a bishita hospital di Corsou

WILLEMSTAD – Minister di salud publico di Aruba Alex Schwengle a bishita hospital St. Elisabeth e siman aki. E mandatario arubano ta na Kòrsou e dianan aki pa un bishita di trabou i a probecha pa bishita Hospital St. Elisabeth, unda e la combersa ku Hunta di Direktiva i tambe cardiologonan di e Centro di cardiologia di Hospital.

INVITACION

E titular di salubridad arubano a extende un invitacion cordial na Hunta di Directiva pa asisti na e conferencia grandi riba salubridad publico, cual ta tuma luga na Aruba di dia prome pa 4 di juni benidero. Ta trata di un conferencia cu participacion di luminarionan riba tereno di medicina i cuido medico di rond mundo i di Reino Hulandes.

INFORMACION DI CARDIOLOGO

E mandatario a ricibi informacion amplio tambe di e dos cardiologonan di e Centro di Cardiologia di Hospital St. Elisabeth, Sam de la Fuente i Kamal Kulichi riba e servicio medico aki, cual por cierto tur dia di nobo ta mustra balor di su existencia. Despues di un presentacion a sigui un recorido na e Centro di Cardiologia mes.

Riba e combinacion di foto por mira minister dr. Alex Schwengle, mei mei, den compania di (robes pa drechi) Henri Gerrits, director financiero, dr. ir. Javier Hernandez, presidente di hunta di directiva, dr. Cay Winkel, director medico, sra. drs. Indra Rossen-Lucasius, secretario general di hunta di directiva, dr. Kamal Kulichi, cardiologo i dr. Sam de la Fuente, cardiologo.