Croes: Cumpra HFO di Ecuador ‘sin intermediario’ por baha e prijs di e producto considerablemente

Croes: Cumpra HFO di Ecuador ‘sin intermediario’ por baha e prijs di e producto considerablemente

Posted on 01/24/2023 3:00 pm AST | Updated on 01/24/2023 3:01 pm AST

ORANJESTAD – E intentonan di gobierno di Aruba a continua pa purba logra un acuerdo cu Ecuador, unda cu e intencion ta pa elimina e ‘intermediario’ pa haci e compra di e fuel cu ta wordo usa na WEB esta e HFO. En bista cu Ecuador su compania nacional di petroleo PetroEcuador ta suministrando Aruba HFO pa un paar di aña caba, a traves di algun intermediario, a ricibi e conseho pa sondea posibilidad pa elimina e intermediarionan. Segun e minister di energia Glenbert Croes, haciendo esey, Aruba a traves di RdA y FMSA por cumpra HFO direct di e compania PetroEcuador. Unabes cu ya no mester paga comision na intermediarionan, FMSA logra obtene e HFO cu descuento compara cu locual ta pagando pe awo na Aruba. Consecuentemente WEB tambe lo ricibi e descuento cual WEB lo por traspasa pa pueblo door di baha prijs di awa y coriente, Minister Croes a splica. E la reuni pa esey e.o. cu Minister di Energia y Minas di Ecuadro Dr. Fernando Santos Alvite y Vice Minister di Hydrocarburos Ruben Dario Espin y PetroEcuador su ehecutivonan y ta consider cu e reunionnan a bay positivo y den bon ambiente. No tin ningun acuerdo ainda y ta spera cu despues por logra esaki si. 

AÑA PASA

Aña pasa minister Croes  tabata na Ecuador na unda cu el a reuni cu e Minister encarga cu energia e tempo ey, cu e proposito pa sondea posibilidadnan cu por resulta den un reduccion di prijs di awa y coriente pa Aruba. Sinembargo e minister e tempo ey a haye den problema legal cu a pone cu e plan a cay na awa y mester a warda te awor pa bolbe cuminsa negosha.  

 

 

 

 

 

 

  • Powered by SETAR