Hooyboer: “Agresion contra cabesante Filomena College ta acto criminal”

ORANJESTAD – “Loke a sosode cu e cabesante di Filomena College ta un acto criminal”. Asina minister di enseñansa Michelle Hooyboer Winklaar a bisa NoticiaCla.com awe mainta. E ta su prome reaccion publico riba e caso di agresion contra e cabesante di e scol “Onty” Lopez ayera. “Ningun acto criminal lo wordo tolera riba of banda di tereno di scol” e mandatario a sigui bisa.

ZERO TOLERANCIA

E mandatario a sigura cu tur incidente cu ta ensera menasa na personal di scol, lo wordo atendi cune rapido y serio. “Ta aplica e asina yama ‘zero tolerancia’ pa cualkier menasa contra seguridad di un scol” e mandatario a sigui bisa.

INCIDENTE LA SALLE

E mandatario a recorda tambe e incidente fin di aña na La Salle College unda cu un doño di un snack dilanti scol a menasa tanto cabesante di e scol, maestronan y indirectamente e studiantenan. “Den e incidente ey mi a haci un apelacion na polis pa actua, y nan a atende cu e situacion den un manera rapido”. Y pa medio di un ‘zona escolar’ e mandatario kier preveni tipo di incidentenan asina.

ZONA ESCOLAR

Pesey tambe e mandatario a confirma cu gobierno ta trahando riba e implementacion di un asina yama ‘zona escolar’. Segun e mandatario a splica NoticiaCla.com, e implementacion di e ‘zona escolar’ ta trece varios ley hunto. Mes momento e ta yena cualkier buraco den ley cu ta specifica actividadnan cu ta y no ta permiti riba y banda di areanan escolar. “Parti di esaki ta pa haya un polis cu lo bira un ‘barrio regisseur’ cu lo tin e tarea di patruya, y pasa riba y banda terenonan escolar di cierto districtonan”. Segun e mandatario, e ta algo cu ya caba a keda identifica den pasado. E asina yama ‘verkeersdrempels’ cu a wordo instala dilanti varios scol, ta parti di e ‘zona escolar’. “E lo duna polisnan e instrumento legal pa actua den casonan specifico aki” Winklaar a sigui bisa.

REUNION CU SIMAR

E mandatario a confirma tambe cu e la yama un reunion cu e sindicato di maestro SIMAR pa mayan, unda cu e lo instala un comision cu lo trece un cantidad di departamento, NGO’s y e sindicato hunto pa traha riba un protocol di codigo di conducta pa tur scol. “Ta trata di e expectativa cu nos tin pa cabesantenan di scol, maestro, alumno, mayornan y cualkier otro trahado na un scol”.