Turista mericano 'pega na Aruba' pa accidente di quad racer

ORANJESTAD – Un turista mericano ta bolbe su cas bek diaranson posiblemente, despues di tabata envolvi den un accidente cu un quad racer na Aruba. Posiblemente pasobra e no tin e placa pa cubri su biahe. E dama, di e estado di North Carolina, a dicidi di acudi na prensa mericano pa ayudo, y asina purba haya fondo pa e gastonan medico incuri na Aruba. E ta bira e di dos turista mericano den cuestion di un siman cu ta haya atencion mericano pa algo cu a sosode durante su bishita como turista.

BIAHE PA ARUBA

E dama, Deanna Kennedy cu su amiga Kenya Dukes ta conta cu nan a biaha pa Aruba siman pasa diahuebs pa celebra su cumpleaño na Aruba. E intencion tabata pa pasa 4 dia den solo y beach. “Pero esey no tabata loke a sosode”.

ACCIDENTE

Mientras cu nan tabata na Aruba, nan a dicidi di bay riba un tour di quad racer, cu den cuestion di minuut, segun version di e turista, a resulta den un accidente serio. Segun e dama ta conta, nan tabata coriendo 6 minuut, ora cu e stuurwil a pega. “Mi a wordo tira afo. Mi a dal mi hip riba vloer y a lora bay”. E la kibra su heup y mester a bay den un operacion di emergencia. “Loke mi no a realisa ta cu mi no por a subi un avion. Mi no por sinta straight” Kennedy a bisa.

AIR AMBULANCE

Segun docternan, Kennedy lo mester un air ambulance pa bolbe Merca, locual ta costa aproximadamente $34.000,= y tin un gasto adicional di $ 22.000,= cu ta di cuido den hospital. “Aki na Aruba nan no ta acepta mi seguro” Kennedy a bisa. Como tal nan mester a busca alternativa pa genera fondo. Nan a lanta un website pa asina yuda nan genera placa. Wak e website aki. Te cu ayera, nan a genera algo mas di $9.000,=. No ta conoci con nan lo a cubri e resto, mirando cu segun nan raportahe, nan ta cla pa bolbe Merca diaranson awor.