Corsou cla pa presenta “Viva La Musica Latina 2015” na mei

ORANJESTAD – Cu no menos cu 8 artista grandi hunto reparti riba dos anochi, e prome evento titula “Viva La Musica Latina 2015” ta ranca sali na Corsou fin di mei proximo (29,30 di mei). Conocido promotor Steve Hudson durante un conferencia di prensa diamars atardi, a splica cu e evento ta priminti di bira uno unico y cual Corsou y region a pidi pe pa basta tempo. For di Gilberto Santa Rosa, te na El Gran Combo y Olga Tañon te na Jorge Celedon, e line-up ta uno di caliber y cu ta garantisa dos anochi di musica solido latino.

SITIO

E sitio ta uno relativamente nobo, esta e parkeo di e centro comercial nobo Sambil. Mientras cu e apertura di e centro comercial aki ta netamente e siman ey tambe, e festival no ta relaciona cu e apertura aki. Esey no ta kita afo cu ta motibo pa celebracion cu Corsou despues di tres aña ta conoce un centro comercial grandi nobo, y un concierto nobo grandi riba e mesun espacio.

ARTISTANAN

E artistanan ta e.o. Gilberto Santa Rosa, Alberto Barros, Guaco, Jorge Celedon, Jose Alberto El Canario, El Gran Combo, Olga Tañon y for di Corsou, Gregory Colina cu ta presenta un compilacion di e miho cancionnan di pasado di Corsou. E artistanan ta reparti riba dos anochi, esta 4 riba cada anochi, cuminsando for di 7;30pm pa 2:00am of mas laat. Den curso di simannan lo tin mas informacion riba e festival grandi aki, cu lo pone Corsou riba mapa latino na luna di mei.