ABA: Banconan lo no absorba gastonan incuri pa ley nobo

ORANJESTAD – Tur e cuater banconan comercial di Aruba ayera, pa medio di Aruba Bankers Association (ABA) a confirma cu nan a bisa semper, cu nan no por absorba gastonan incuri pa cumpli cu e ley di “Exchange Rate Margin Compensation”.Si tabatin cualkier duda cu banconan tabata riba un liña, esaki a keda desbarata durante e conferencia di e asociacion diamars. Tur 4 director di e respectivo banconan tabata presente y a confirma nan punto. Y e loke a sosode, (segun ABA) ta cu ‘ mester tabatin un malcomprendemento’ entre e mandatario responsabel pa finanzas y e sector bancario ora cu a discuti e asunto aña pasa.

IMPONE

Loke e banconan a mustra ta, cu e problema cu nan tin cu e ley cu a keda ‘impone’ riba nan esta e “Exchange Rate Margin Compensation”, ta cu no tin ningun otro ‘vehiculo’ pa atende cu e asunto aki. Como ehempel, a duna e gasto p.e di cobra check. Ora cu cobra check, ta cobra un suma pa e trabou. Pero si e cliente haci uso di p.e e servicio online, e no tin cu paga e gastonan. E ta motiva e cliente y dune un opcion pa no tin cu cumpli cu e parti ey. Den e caso di e gasto ‘extra’ awor, no tin e posibilidad ey.

GANASHI

E suma cu e banconan ta cobrando e cliente bek den e caso specifico aki, no ta nada substancial. Y como tal banconan no ta haciendo ganashi riba dje. Ta simplemente pa nan keda solvente y no bay atras den nan situacion financiero. A splica tambe cu un banco mester haci ganashi, pa por garantisa e fluho di placa cu ta circula den e banco. E ta e garantia cu esnan cu tin placa deposita, por tin e placa aki sigura. Si banconan no tin ganashi, un persona no ta pone su placa riba e banco.

CLAUSULA

E hecho segun presidente di ABA, Pierre Rafini e ley no tin un clausula pa stroba banconan di cobra, ta netamente pa duna e banconan e flexibilidad si nan kier cobra e cliente of no.

DISPONIBEL

Pa awor, fuera di e informacion cu a keda publica caba, banconan ta keda disponibel pa atende cu e mandatario, pero lo sigui cobra e suma manera cu nan a anuncia cu nan lo haci. No ta nan intencion pa busca contacto politico cu e mandatario en cuestion, pero si e mandatario kier sinta papia, esey ta posibel.

MEDIDA

Tambe ta keda na cada banco, si nan ta tuma otro medida, manera e.o. keda sin ofrece servicio di foreign exchange, manera cu e presidente di ABA a declara algun dia pasa na NoticiaCla.com. Un di e banconan cu lo no haci esaki, ta Caribbean Mercantile Bank, cu a confirma esaki pa medio di nan director Javier Wolter.