SIMAR: Maestronan ta protesta diaranson pa sostene cabesante agredi

ORANJESTAD – Maestronan na Aruba lo participa den nan di dos protesta silencioso diaranson, bistiendo un biaha mas na preto. E protesta aki ta un reaccion directo riba e agresion diamars di studiantenan enmascara contra e cabesante di Filomena College Mavo. Segun secretario di e sindicato di maestro SIMAR, Maroeschka Cornelie a confirma na NoticiaCla.com, cu nan a tuma nota di e caso lamentable y ta hopi disgusta cu e situacion.

PROTESTA

Segun Cornelie, e accion di diaranson ta pa sostene e cabesante y demostra e malcontento di e maestronan. “Un biaha mas SIMAR ta haci un yamada na tur maestro y docente pa nos sostene nos colega y mustra un biaha mas cu nos ta preocupa y cu nos no por sigui tolera mas abuso y intimidacion di maestro”, e sindicato a pone riba tambe riba nan Facebook page.

REUNION MINISTER

E secretaria di SIMAR a confirma tambe na NoticiaCla.com cu diahuebs awor nan lo sinta cu minister di enseñansa Michelle Hooyboer Winklaar, ‘pa papia di e topico y wak kico nos ta bay haci’. “Nos ta pensando den escala accion” Cornelie a confirma na NoticiaCla.com diamars anochi. Pero e la clarifica cu e accion e biaha aki no ta contra minister, pa no bruha cuenta. “E ta mas bien pa concientisa, spierta comunidad”.

KICO A SOSODE

Pa loke ta e caso mes di diamars, informacionnan cu tin ta mustra cu un grupo di alumno (posiblemente di e scol mes) lo a subi tereno di scol, tabatin nan cara tapa, y bay riba e cabesante. E cabesante na e momento ey lo tabata serando e scol. Segun Cornelie su informacion, e lo a haya golpi den cara. Informacion confirma cu NoticiaCla.com tin ta cu e cabesante mientrastanto a entrega keho. E la confirma cu e la haya sla, aunke no hopi serio y cu e ta ok.