Construccion Bahia Principe awor ta cuminsa final di 2015

ORANJESTAD – Debi na un retraso di por lo menos 3 pa 4 luna, e proyecto hotelero “Bahia Principe Don Pablo Collection” lo no habri mas na 2016 sino den 2017. Esaki a keda confirma pa e representante di e compania, Adolfo Castellanos awe mainta na NoticiaCla.com. Tabata durante e entrega di e respectivo documentonan relevante na e proyecto, na minister di turismo Otmar Oduber awe mainta, cu Castellanos a splica di e retraso aki. “Obviamente esaki no ta cuminsa na april mas, manera inicialmente anuncia", Castellanos a bisa NoticiaCla.com. 

ENTREGA RAPPORTNAN

E momento awe mainta tabata pues pa entrega di documentacion necesario, manera MER rapport, otro tipo di estudio, e largura di e periodo di construccion, impacto social y economico na gobierno. Ayera nan a entrega e plannan preliminario di construcion na DOW pa e forma ey e proceso ey por cana tambe. E ta nifica un evaluacion di e documentacion pa gobierno, pa despues sigui e traspaso di e terenonan respectivo na e compania.

TARDANSA CONSTRUCCION

E mandatario a admiti cu inicialmente a prik e fecha di april pa e proyecto cuminsa, pero a tuma mas tempo pa estudio di e proyecto. “ E lo duna nos un tres pa 4 luna pa nos por mira construccion start, prome cu fin di aña ainda” Oduber a sigura NoticiaCla.com awe mainta.

APERTURA 2017

“E fecha ta cambia” Castellanos a bisa NoticiaCla.com. Segun e representante, hotelnan ta purba habri net prome cu un temporada halto sea di Merca of Europa. “Nos mester adapta nos periodo di apertura. Nos ta bastante flexibel” Castellanos a bisa. Bisando esey, Castellanos ta premira cu pa e temporada halto mericano of europeo di 2017, nan lo por habri e hotel na Aruba. “Nos no sa, te ora cu nos tin tur e documentacion. E por ta mei 2017 of october 2017.” E proyecto no ta cambia di forma, ni nada otro.

BEACH IMPORTANTE

Segun Castellanos, nan a bin ta prepara pa percura cu e.o. e beach ta ok, y otro areanan manera cancha di tennis, mirando cu ta trata di un zona basta virgen y abandona. A presenta e forma pa regla tur esaki. Financieramente e tardansa no ta causa ningun tardansa. Den proximo articulo lo bin cu mas detaye di e proyecto completo.