CFT: Presupuesto 2015 di gobierno falta mas adaptacion

ORANJESTAD – Gobierno di Aruba no a adapta su presupuesto 2015 substancialmente manera cu College Financieel Toezicht (CFT) a recomenda. Y como tal CFT ta haya su mes ta ripiti un total di 4 recomendacion pertinente pa sigura buena marcha di e presupuesto. Asina e presidente di CFT, Age Bakker ta manda bisa minister di finanza Angel Bermudez pa medio di un carta fecha 10 di april ultimo (lesa e carta aki). Fuera di e medidanan recomenda, CFT kier pa gobierno manda nan, raportahe nan periodico di ehecucion di e presupuesto. Y di esaki, nan kier e prome rapport mas tarda mitar di luna di mei.

CUATER MEDIDA

Entre e 4 medidanan, ta figura (un biaha mas) 1. Pa para tur indexering automatico, 2. Introduci e asina yama solidariteits belasting, 3. Presenta un stappenplan di e ehecucion di e plan di gobierno, 4. Duna prioridad na e sistema administrativo. Ademas CFT ta mustra cu den e medidanan cu gobierno a anuncia di lo tuma (un total di 24), tin basta risico mara na nan. Esaki den e sentido cu riba algun (10) no a tuma decision ainda y/of no a cuminsa cu e ehecucion di esaki ainda.

MEDIDANAN NO CUMPLI

Manera ta conoci, gobierno a presenta un pakete di 24 medida na CFT, cu e organo consultativo ta aprecia. Sinembargo, realidad segun CFT ta menciona den e carta, ta cu apenas 14 (segun gobierno su contesta dia 30 di januari ultimo na CFT) ta cla, pasa y posiblemente ehecuta. Ainda falta pues 10 medida, di cual no a ni dicidi ariba of cuminsa cu su implementacion. Di otro banda, CFT ta conciente cu desde e fecha di e informacion aki di gobierno (30 di januari ultimo), cosnan lo por a cambia y entretanto esaki lo por a cambia tambe.

RETO FINANCIERO

Pa CFT, e situacion financiero di gobierno ta keda un reto grandi, y como tal ta pertinente pa CFT haya raportahe nan periodico di e loke ta sosodiendo, y cu lo ta bon pa duna esaki na presupuesto tambe. “De hecho, unabes cu presupuesto aproba e presupuesto 2015, nan lo kier keda na altura di su ehecucion”.