DIP: Ta atendiendo cu e 'incidente' na Baby Beach cu establecimento 'Big Mama'

ORANJESTAD – Directie Infrastructuur en Planning (DIP) a tuma nota di e incidente cu a tuma luga na Baby Beach diasabra 14 di januari, entre un empleado di DIP y e empresarionan cu ta doño di e establecimento Big Mama. Durante e incidente aki segun un raportahe di e medio 24ora.com, e empleado di DIP lo a bin cu orden pa cera e lugar. Un otro medio, Solo di Pueblo a raporta diamars cu esaki lo no por ta corecto, pasobra e trahadonan no ta traha riba diasabra. DIP sinembargo, pa medio di nan propio relato, ta mustra cu ta nan trahado y cu ‘nan ta atendiendo’ e asunto aki. E asunto ta uno di e hopinan aparentemente cu tin pega na DIP pa loke ta papeleo atrasa. 

LAMENTO

DIP den nan comentario a lamenta loke a sosode y a manda pidi e empleado concerni pa e traha un relato di loke a pasa. Tambe DIP a manda invita e empresarionan di Big Mama pa un reunion pa asina nan por duna nan version di e caso.

PROCESO ANDANDO

Segun DIP, nan ta sigui bisa, ta asina cu internamente riba nivel ambtelijk y segun ROPV tin un proceso andando pa establece un linea di maneho fiho pa loke ta trata e tereno y espacio den e area aki di costa di Aruba. 

NO TA CLA AINDA

Sinembargo DIP a sigura cu ainda no ta asina leu cu por sinta na mesa cu tur stakeholder. Asina cu proceso aki ta cla lo invita tur esnan concerni pa hunto soluciona cada un di e casonan aki segun ley y regla ya estableci.