Bermudez: E siman aki ta anuncia director nobo di Douane

ORANJESTAD – Pa mas tarda diabierna awor, lo conoce ken ta e director nobo di Douane. Esaki minister encarga cu e departamento, Angel Bermudez a sigura NoticiaCla.com. E nombernan ta conoci serca e mandatario, y e siman aki e decision ta cay. Manera ta conoci, tin un ansiedad pa sa ken e persona aki lo bira, mirando cu tin hopi trabou pa tuma lugar den e departamento aki. Entra nan, e sindicato SADA hopi biaha a mustra nan precupacion pa cu e tardansa aki.

PROCESO FINAL

E mandatario a sigura NoticiaCla.com cu tur cos ta canando y cu porfin e proceso a finalisa y cu e siman aki, mas tarda lo keda cla cu e nombracion y lo haya sa porfin, ken di tur lo bira e hefe nobo na e departamento aki.

SOLICITA

Ta conoci cu hopi hende a solicita pa e funcion aki. Entre nan personanan cu a carga e funcion aki caba, y algun for di e propio seno di douane. Pero na final di cuenta, ta un persona ta haya e titulo nobo aki, y tin cu asumi su responsabilidad. Den curso di e simannan nos dilanti, e mandatario lo duna un splicacion kico tur e ta spera di e persona aki y e departamento completo.

CAMBIONAN PENDIENTE

Entre e cambionan, lo mester bin un mudamento pa un edificio apropia, simplificacion di e trabou, y tambe otro asuntonan cu ta rekeri hopi trabou ainda. Reformacion di e departamento ta uno cu ta halto riba e lista di e mandatario. Pero debi na problemanan otro, e no a haya ‘chens’ total di dedica su mes na e asunto aki. Unabes cu e asunto di presupuesto ta tras di lomba, e ta spera cu e por dedica mucho mas tempo na e asunto aki