Presupuesto 2014 ainda no ta firma

ORANJESTAD – No obstante e hecho cu gobernador di Aruba Freddis Refunjol a ricibi e reaccion di gobierno di Aruba riba e quick scan di College Financieel Toezicht riba e presupuesto 2014, e no a firma e presupuesto ainda. Gabinete di gobernador diamars merdia a confirma na NoticiaCla cu gobernador lo avisa asina cu esaki sosode. Cu esaki den mente, partido di gobierno AVP mientrastanto a convoca un reunion di partido (Partijraad) pa diamars anochi na nan sede na Cas di Partido na Playa.

Segun e invitacion, ‘un bes mas rumbo cu Pueblo a escohe cu gran mayoria a haya rason y cu segun AVP, e quickscan a bisa cu Presupuesto 2014 mester wordo firma. ‘Pero ainda apesar di promesanan, no ta cumpli cu Pueblo su Presupuesto aproba pa gran mayoria den Parlamento’ e invitacion ta sigui bisa. Intencion segun e invitacion ta pa duna informacion detaya y hunto fiha e caminda pa cana pa garantisa respet pa Aruba y bienestar pa un y tur riba nos dushi baranca’. No ta conoci kico kier men cu ‘e caminda pa cana’, pero esey lo keda divulga diamars anochi. E corant hulandes nu.nl mientrastanto ta skibi cu unabes cu e 6 siman completo caba di e investigacion di CFT, gobernador lo firma e presupuesto.

Tanten e presupuesto no ta firma, cierto gastonan no por wordo haci, y esey ta stroba operacion di gobernacion y ta afectando e economia di nos pais. Minister Benny Sevinger a confirma esaki na NoticiaCla, y director di ATIA Ronald van Trigt tambe a mustra su precupacion pa cu esaki.