TPEF a firma acuerdo cu Fundacion Stimami Sterilisami pa sterilisa 6 mil mascota mas

ORANJESTAD – Diahuebs mainta den un conferencia di prensa conhuntamente cu president di e board di “Tourism Product Enhancement Fund” (TPEF) sr. Mario Arends y tambe e president di Fundacion Stimami Sterilisami (FSS) sr. EwaldBiemans, Minister Dangui Oduber a anuncia y firma un acuerdo caminda un biaha mas TPEF ta bay duna sosten financiero na FSS. E fundacion aki ta pa yuda cu sterilisacion di cacho y pushi nan di caya y tambe pa yuda doñonan sterilisa nan mascota. E programa di sterilisacion aki ta un colaboracion di sector publico conhunto cu sector priva.

E Fundacion di Stimami Sterilisami ta ricibi subsidio for di TPEF anualmente cu excepcion di aña 2021 debi na e pandemia. Nan ta haci hopi bon uzo di esaki y ta traha na un manera eficiente. Nan ta traha cu 5 diferente veterinarionan di Aruba. Durante aña 2022 e fundacion a logra steralisa un total di 3686 pushi y cacho riba nos isla y nan tin como meta den aña 2023 pa sterilisa alrededor di 5 mil/6 mil pushi y cacho.   Abase di programanan asina, den wowo di nos bishitantenan ta eleva e imagen di e producto Aruba. E meta ta pa haci nos comunidad mas consciente riba e problematica aki, mantene e mascotanan den cura ta evita cu nan ta keda reproduci. Lo bay sigui enfoca riba e campañanan di conscientisacion pa tene nos comunidad bon informa.