Rosanna van Dijk apunta como directora nobo di Asuntonan Social

ORANJESTAD – Gobierno a nombra sra Rosanna van Dijk como e directora nobo pa departamento di Asuntonan Social. Diahuebs minister cu ta responsabel pa Asuntonan Social, Rocco Tjon a reuni cu ne y riba su trabounan proximo. Segun e mandatario, entrante 15 di februari proximo sra van Dijk ta inicia cu su labornan.  Sra. Rosanna tin un trayectoria bastante amplio pa loke ta trata e tereno di psicologia y maneho di asuntonan social. Rosanna van Dijk ta casa cu Ricky Beaujon y nan tin un yiu homber. Minister a gradici tambe Sra. Tarsis Siera, kende a eherce e trabounan mientras cu e funcion tawata habri, despues cu e ex directora a baha cu pensioen, esta sra Glenda Hernandez y actualmente ta fungi como director interino di Arubahuis na Den Haag, Hulanda.