ABA: Banconan no ta cambia maneho di cobra pa “Exchange Margin Compensation”

ORANJESTAD – Banconan a fiha nan posicion riba e cobransa na nan clientenan pa loke ta e “Exchange Rate Margin Compensation” y no ta desvia di esaki. Asina e presidente di asociacion di banconan na Aruba, Pierre Rafini a bisa NoticiaCla .com dialuna. Mes momento, e ta bisa cu declaracion di minister di finanza Angel Bermudez, di cu ‘banconan no por ‘verreken’ e cobransa ey cu su clientenan’, no a cay den bon tera serca e asociacion di banconan na Aruba.

FUERTE Y DURO

Segun Rafini, tur e bankeronan tabata “Sumamente sorprendi cu e minister a haci un declaracion cu ta asina fuerte y duro contra sector bancario”. Sigur, si tene cuenta cu e ley ta bisa claramente cu ‘e no ta exclui cu banconan lo por cobra e Exchange Rate Margin Compensation’ na nan clientenan. Y segun Rafini, pesey banconan lo continua cu nan decision di pasa e cobransa pa nan clientenan.

ABSORBA GASTONAN

Rafini a reitera cu banconan no por absorba gastonan cu nan no tin control riba dje. Y e gasto aki, ta uno asina y cu a wordo impone riba nan. Y den e caso aki, si tin leynan cu ta preveni banconan di ‘draag esaki door’, dependiendo di nan entrada y gasto, cada banco por dicidi cu ta stop di duna e servicio di compra y benta di ‘foreign exchange’, esta compra di e.o. dollar y euro. Algo cu banconan no kier yega na dje pero, cu ta keda un si como un posibilidad. “Ora cu gastonan wordo impone sin cu bo ta keda cu ningun alternativa pa bo por recobra esaki, ya caba bo ta treciendo e negoshi di sector bancario den un situacion financiero precario”. Y como tal Rafini no ta kere cu e banconan lo acepta esaki. E ta un manera ‘fini ‘pa bisa cu casi bo ta ‘nacionalisa e banconan’, Rafini ta bisa. Y ta algo cu inversionistanan y accionista di e banconn local lo no aprecia.

STOP DI BENDE DOLLAR

Un di e opcionnan pues cu e banconan lo por tin, ta cu nan ta cobra e cliente, of nan ta stop di bende ‘foreign exchange’ cu ta pone cu e ora e banco no tin e gasto ey mas. Esey ta nifica, crioyamente bisa, cu bo tin cu busca esaki otro caminda. E hecho cu banconan lo por stop di bende foreign exchange, ta un opcion cu e banconan tin. No ta necesariamente un ‘done deal’ segun Rafini. E importante ta cu si e no por carga e gasto aki y ta pone e situacion di ganashi den un problema, e por dicidi cu e ta sigui haci su negoshi di banco regular, excluyendo solamente e parti di benta y compra di foreign exchange.

DECLARACION DI MINISTER

Rafini ta sigura NoticiaCla.com cu e no ta corda cu minister a bisa e tempo ey, ora cu tabata preparando y pasando e ley, cu banconan a duna palabra di lo no bay cobra e gasto aki na nan clientenan, manera cu e minister ta pretende awor. “Mi no sa cu den mi ausencia otro miembronan di ABA tabatin conversacion cune. Pero ami no tabatin ningun tipo di conversacion riba e nivel aki cu minister Bermudez”. E (Rafini) lo tin cu bay verifica esaki cu su otro miembronan bancario di ABA, pa wak si enberdad cierto di e comentarionan aki a wordo haci.

MANEHO DEFINI

Cualkier otro forma di acercamento no ta na vigor aworaki pa cu e minister. “Banconan a defini nan maneho caba pa cu esaki y ta bay cobr’e, pasobra no por pone como un gasto extra den nan operacion. No bende of cumpra ‘foreign exchange’ no ta manca e operacion di un banco segun Rafini. E ‘core business’ di un banco ta duna lening y gana interes riba e lening aki. Tin tambe entrada riba varios otro servicio, pues keda sin ofrece e producto di e ‘foreign exchange’, lo ta un opcion si banconan no por pasa e gastonan aki door mirando cu absorba e gastonan aki no ta un opcion ya cu e ta debilita e operacion di e banconan.