Di 12 buelo di Merca, 8 a yega y bandona Aruba awe cu hopi retraso

ORANJESTAD – Di e 12 buelonan cu Aruba a ricibi diaranson for di Merca, por lo menos 8 a yega y consecuentemente bolbe cu un retraso di entre 45 minuut pa 4 ora di tempo. Esaki debi na e problema cu a inicia mainta trempan na Merca ora cu e sistema di computer di e agencia federal di aviacion Mericano FAA a faya. A para tur avion di sali for di Merca te 10am ora di Merca (9am ora di Aruba:red). Consecuentemente esaki a causa e retraso necesario ora di yegada di e avionan. Y consecuentemente ora cu nan a bolbe esaki tambe a causa e retraso necesario. 

CONECCION

Esaki a pone cu e schedule a desrumpi bastante, y pasaheronan mester a check individualmente pa nan respectivo aeroliña y buelo bek, conforme peticion di autoridad local di aeropuerto. Loke ta haci e asunto mas fastioso ainda ta cu varios di e buelonan aki ta haci coneccion pa otro destinacionan, manera Miami, Orlando y Charlotte. No ta conoci si esaki a keda acomoda tambe debi na e cambio aki. 

YEGADA 

E destinacionan cu a conoce mas retraso tabata buelonan di Orlando, Charlotte, Newark y JFK, unda cu tabatin retraso di entre 2 pa 4 ora di tempo tanto di bay como bin. Buelonan programa pa atardi, no tabatin e problema aki y tabata riba schedule normal. Aki por papia di un buelo di New York y Miami, ambos programa pa yega despues di 4’or di atardi ora di Aruba, cu ta nifica cu nan a sali despues di e problema y no a keda afecta.