Gobierno ta aumenta ‘Cruise Passenger Fee’ cu $4.50 otro aña

ORANJESTAD – Cada turista crucero cu yega Aruba otro aña, tin cu paga 8 dollar na impuesto, conoci como e Cruise Passenger Fee (CPF) cu ta manera un ‘airport tax’ pa crucero. Awor e turista crucero ta paga $ 3.50, pues ta conoce un aumento di $4.50 pa cabez. E decisión aki a cay for di aña pasa y a pasa e informacion aki pa e liñanan crucero caba según e minister encarga cu turismo, Otmar Oduber.

AUMENTO SIGNIFICATIVO

Na momento cu esaki drenta na vigor lo mira un aumento significativo di loke e pasahero crucero ta paga na momento cu e yega Aruba. E mandatario a bisa cu despues di 20 aña cu Aruba no a aumenta e cobranza pa cabez di e pasahero crucero, a yega na un division unda cu den e 8 Dollar aki ta logra cu tanto APA lo conoce un entrada significativo mas halto (3 Dollar di e 8 Dollar) e 5 Dollar restante lo wordo dividi 2.50 Dollar pa incentivonan cu ta wordo crea pa tanto como mercadeo. E otro 2.50 Dollar lo ta dirigi pa e contribucion di turismo pa operacion di tram y diferente museo cu a haya un capa nobo unda cu tin un overkoepelend orgaan riba e 5 museonan na Aruba.

ENTRADA EXTRA PA ARUBUS

Oduber a indica cu esaki ta significa cu Arubus lo conoce un entrada adicional unda cu e turistanan ta contribui cu e servicio di tram. Di otro banda, awor cu e museonan ta den un bachi nobo, lo cuminsa cobra entrada y e pasaheronan crucero lo por drenta ‘gratis’ a traves di un ‘fixed fee’ cu lo wordo paga adelanta.