Desaroyadornan “Bahia Principe” ta entrega rapportnan diamars

ORANJESTAD – E compania responsabel pa desaroyo di e hotel ‘Bahia Principe’ , Grupo Piñeros lo entrega nan documentacion necesario na gobierno di Aruba diamars mainta tempran. Basa riba e documentacion aki, cu ta ensera entre otro rapportnan di medio ambiente, y demas informacion, lo dicidi si ta otorga e tereno na e compania finalmente. Ta premira cu esaki lo por tuma algun siman, pa despues haci e traspaso di e tereno pa e compania.

MOU

Manera conoci, e grupo aki a firma un MOU na mitar di october aña pasa pa asina sigura un proyecto hotelero pa San Nicolas, cu lo tin cu cuminsa cu construccion e prome cuartal di e aña aki pa por sigura cu e hotel por habri su porta na october di 2016. No ta conoci si e lo por logra esaki ainda, mirando cu e plan tabata pa efectua e ‘ground breaking’ pa fin di maart di e aña aki.

SEROE COLORADO

E idea ta pa e hotel keda ubica na e parti di Sero Colorado y tin cu genera 600 cupo di trabou, y bira un proyecto hotelero estilo All inclusive, incluyendo un centro comercial tambe.