Pisas: Reunion na Corsou pa cu habrimento di frontera cu Venezuela no a sigui awe

WILLEMSTAD - E reunion ku tin di tuma lugá awe djaluna 9 di yanüari pa ku habrimentu di frontera ku Venezuela no ta sigui. Esaki promé minister ta anunsiá. Den un diskurso nashonal na kambio di aña, promé minister Gilmar Pisas  a bisa ku Gabinete Pisas II su vishon ta pa hasi Kòrsou e Pèrla den Karibe. Pa esaki tin hopi trabou tras di lomba i tambe trabounan ku tin ku keda ehekutá pa por logra nos ophetivonan.  Gobièrnu ke keda informá pueblo pasobra ta huntu tin di sigui traha ku tur e amor, energia, kurashi, perseveransia i determinashon nesesario, pa por logra resultadonan positivo pa nos komunidat.

Di parti di Gobièrnu di Kòrsou a sera aña 2022 ku un relato pa informá komunidat, den un forma transparente, reflehando kiko tur loke e Gobièrnu aktual a kumpli kuné. Esaki ta duna un bista kiko a logra i unda tin ku buta èkstra énfasis

Ayera sinembargo promé minister ta informá ku Kòrsou tabatin un proposishon pa tene un reunion ku Venezuela pa ku habrimentu di frontera  awe djaluna dia 9 di yanüari 2023.

Pa motibunan fuera di nan alkanse, esaki lo no por tuma lugá mas awe 9 yanüari. E proposishon pa e fecha nobo lo ta den e siman di 30 yanüari 2023.

E tópiko aki ta importante pa Kòrsou, pues lo sigui hasi tur intento pa e reunion aki sigui mas pronto posibel.

Na kuminsamentu di desèmber Minister-presidente Gilmar ‘Pik’ Pisas a risibí Embahador di Reino na Caracas sr. Robert Schuddeboom i durante di e bishita aki a elaborá tokante e proseso ku ta andando pa ku habrimentu di frontera entre Venezuela i Kòrsou, Visa, situashon ekonómiko aktual di Venezuela, e situashon di migrantenan for di Venezuela, kual tur por ta e oportunidatnan ku tin presente pa por hasi negoshi ku Venezuela den futuro i algun tópiko mas di karakter sensibel.

E dia ei promé minister Pisas a gradisí Schuddeboom pa tur informashon ku el a risibí i tambe pa tur esfuerso ku el a bin ta hasi pa e proseso rondó di habrimentu di frontera entre Venezuela i Kòrsou.

Mas fin di desèmber promé minister ta duna e bon notisia ku frontera lo habri den e promé siman di yanüari. Esaki sinembargo lo no tuma lugá mas teniendo na kuenta kombersashonnan ku tin di tuma lugá promé i ku awor a keda posponé pa fin di yanüari.

Siman pasá sinembargo, despues di vários aña ku frontera tabata será, e promé barku turista MS Amadea ku ta nabegá bou di bandera di Bahamas i ku 600 pasahero abordo lo sali for di Isla Margarita dia 3 di yanüari i yega Boneiru dia 4 di yanüari 2023 pa despues e sigui pa Aruba. Esaki a hasi a trese mas serka e realidat pa frontera ku Venezuela habri. Awor nos ta spera 30 di yanüari ora e reunion tuma lugá. NOTA: E texto ta scirbi den Papiamento fonetico di Corsou.