Mas medida pa biaheronan di Venezuela cu bishita e.o. Aruba

ORANJESTAD – Banco Central di Venezuela a revisa su restriccionnan pa biahero. Asina Antiliaans Dagblad ta raporta awe. E anuncio tabata den e asina yama ‘staatscourant’. Pa un biahe minimal di 3 dia na Aruba, Corsou y Bonaire, venezolanonan por uza 300 dollar di nan credit card. Esey no a cambia. Loke a cambia ta entre otro e cantidad di placa por saca mil dollar menos.

SPECIFICACION

Pa un estadia di entre 4 pa 7 dia no por gasta mas cu 500 dollar. Una bes cu yega e suma ey, por subi e cantidad cada bes cu 25 dollar te na un minimo di 700 dollar. E sumanan aki ta conta tambe pa Surnam, Merca, Mexico y Panama.

EUROPA

Pa destinacionnan mas leu manera Europa y Azia, por a saca te cu 3.000 dollar. Esaki a keda reduci di entre 1000 pa 2000 dollar so. Pues un reduccion di 1.000 dollar. Esey ta placa cash. Riba credit card por a hiba 300 dollar, y esey a bira awor 200 dollar. Tur esaki ta un medida pa evita problema cu e mercado di devisa y fraude cu e transaccionnan financiero.