Caso di drive-by shooting na San Nicolas ta laga hoben herida

ORANJESTAD - Dialuna algo pasa di mey anochi, a bolbe sosode un otro caso di drive by shooting. E biaha aki den caya Bonaire na San Nicolas, un hoben di mas o menos 16 aña riba un bais, a wordo alcansa pa tironan cu ta sali for di un auto desconoci. E hoben a wordo alcansa den su lomba. Mesora a pidi pa presencia di polis y ambulance. Na yegada, e polisnan a topa cu un hoben cu a ricibi e tiro den su lomba. Polis no por a warda riba ambulance, mirando cu e hoben tabata sangrando hopi. Polis a dicidi di transporta e hoben den e patruya di polis pa Centro Medico. Na Centro Medico mesora a transporte cu ambulance pa hospital, unda e la keda interna. Na e sitio polis, departamento tecnico di polis, y tambe un team di recherche a yega na e sitio, pa hasi mas investigacion. Mucho informacion no ta conoci ainda, mirando cu e caso ta bou investigacion.