HOH: Tratamento pa incidente di fin di aña a subi na Departamento di Emergencia

ORANJESTAD - Tratamento pa incidentenan fin di aña a a subi na Departamento di Emergencia di hospital Horacio Oduber. Asina e hospital a informa diamars. Manera ta conoci, anualmente Horacio Oduber Hospital ta haci un analis di esnan cu acudi na Departamento di Emergencia e dianan prome, durante y despues di cambio di aña. E analisis a cuminsa dia 30 di december 2022 pa 6pm y a termina dia 2 di januari 2023 pa 6am. E cantidad di persona total cu a acudi pa sea ricibi atencion medico na Departamento di Emergencia of dokter na warda tabata 361. Aña pasa ainda Aruba tabata den e gara di Covid y e cantidad di pashent tabata un poco menos, esta 326 y na aña 2020 hasta 262. 

VUURWERK

E aña aki a atende 3 victima di vuurwerk. Aña pasa tabata ningun caso cu ta algo remarcabel y e na 2020-2021 tabatin 2 caso di vuurwerk.

ATENCION MEDICO

Di e 361 persona un total di 152 a ricibi atencion medico na Departamento di Emergencia cual 54% ta masculino. E edad di mas abou cu tabatin mester di atencion na departamento di emergencia ta un baby di 3 luna y e pashent di mas grandi tabatin 94 aña. Edad averahe di e grupo cu a acudi tabata 48,7 aña. Edad cu mas a acudi Departamento di Emergencia ta entre 19 cu 65 aña.

MOTIBO DI BISHITA

Ta interesante tambe pa analisa e motibo di bishita durante e fin di siman di di fin di aña. Di e 152 pashentnan cu a acudi na Departamento di Emergencia 68 tabatin herida/lesion: 12 tabata involucra den un accident di trafico, 7 persona den incidente di violencia, 3 pa motibo di vuurwerk y 46 pa motibo di por ehempel caidanan, verzwik enkel, corta etc. E otro 84 casonan tabata pa motibonan otro cu no tin di haber cu traumanan fisico manera por ehempel intoxicacion, dolor na pecho, dolor di stoma, sacamento, un of otro infection, reaccion alergico etc. Di e 152 pashentnan cu a acudi na Departamento di Emergencia un total di 45 pashent a ser admiti den Hospital. Alabes mester bisa tambe cu 60% di pashent admiti ta masculino. Edad averahe tabata 51,6 aña.