Plan ‘nobo’ pa Ferry den Caribe, incluyendo Aruba, ta cu sosten di Nacionan Uni

MIAMI –E plan di inicia cu e servicio di ferry pa Caribe, unda cu Aruba, Bonaire y Corsou ta inclui, lo keda endorsa pa Nacionan Uni. Sinembargo ta mustra cu un di e islanan crucial riba e ruta, Barbados, ta wordo laga afo, como ‘castigo’ pa a boycotea gobierno mericano den varios accion den pasado. Manera cu Noticiacla a raporta caba, e plan ta basta avansa caba y ta mustra cu e mester bira un beneficio maritime comercial pa e islanan incluyendo islanan ABC. E ta un implementacion pa medio di e concepto conoci PPP (Public Private Partnership). Con lo involucra Aruba aden, no ta conoci. 

ISLANAN PARTICIPE

Segun e raportahe, e organisacion latino americano ECLAC ta esun principal cu ta manehando e plan aki. E link lo mester conecta paisnan manera Guyana, Surnam, Puerto Rico, Antigua and Barbuda, y e islanan ABC. Otro paisnan (dependiendo e ruta (tin 4) inclui den e plan ta Colombia, Trinidad, and Tobago.

ECLAC

Pa esnan cu no ta conoci cu ECLAC, e ta un organisacion sostene pa Nacionan Uni y ta forma pa 46 miembro, incluyendo Barbados. Pesey e echo cu a laga Barbados afo, ta algo hopi remarcabel. 

SOSTEN

Sosten technico a wordo brinda na e Asosacion di Estadonan Mericano (AOS) pa produci e raportahe riba e plan unico aki. Nacionan Uni no a duna su permiso ainda pa e plan, pero ta mas  sigur cu e lo endorsa e continuacion di e inicativa aki.  

FERRY DEN PASADO

E noticia inicial publica  riba noticiacla, a crea basta scepticismo, mirando e trayectoria di noticianan relaciona Ferry. Den pasado, varios signatura di gobierno a priminti e yegada di e Ferry, pero tur a keda na plan y idea y ningun a materialisa. Cada biaha tabata un asunto diferente, manera placa, permiso, logistica, y semper e plannan tabata caba na nada.