Serlimar confrontando problema cu cobransa di piki sushi

ORANJESTAD – Ainda Serlimar no ta completamente cla cu e cobransa di e servicio di piki sushi di cas cu a drenta ta vigor entrante januari ultimo. Asina e matutino Bon Dia Aruba ta bisa den su edicion di awe. Segun e matutino, aunke e mayoria di facturanan a sali, ainda tin un parti pa entrega via Postkantoor segun e vocero Nathalie Wolff. El a indica cu ta un proyecto grandi pa saca 40 mil factura, y tin hopi nomber y adres cu no ta cuadra. Nan ta hayando contratiempo cu hopi adres cu no ta existi of e ta algo totalmente otro cu un cas. E ya a reconoce cu Serlimar ta pasando den un temporada druk cu e asunto aki.

EXONERACION

Esun cu no a ricibi e factura anual no ta wordo exonera di paga. Tampoco nan no ta bay cobra multa; y esun cu a haya e recibo laat por paga nan luna pa luna.

Nan ta consciente cu e prome factura cu a sali na luna di maart mester a bay mas trempan. E ta un factura anual ya cu e suma di e servicio ta keda mescos na balor di 26 florin pa luna. E facilidad ta keda existi mirando cu e ta aplicabel p’e aña completo.

Te aworaki tur adres cu ta hayando e Servicio di Serlimar mester paga. Loke gerencia di Serlimar ta sintando na mesa cu gobierno ta riba e servicio pa e hendenan cu ta depende di un onderstand, mester yega na un acuerdo cu gobierno con nan lo cobra nan.