Intencion ta pa introduci A.B.B. di 6% na januari 2016

ORANJESTAD – Si tur cos ta bon, gobierno di Aruba lo elimina e concepto actual di B.B.O. y invoerrechten, y reemplaza esaki cu Algemene Bestedings Belasting (A.B.B) ora aña bolter. Segun e mandatario encarga cu finanzas Angel Bermudez a splica NoticiaCla.com, e intencion ta pues pa reemplaza tanto B.B.O. y B.A.Z.V. cu A.B.B. na un porcentahe di entre 6 pa 8%. E pensamento cu ta ‘djis’ hinca B.B.O. den un bachi nobo y yame otro cos awor, ta porta ‘un pensamento simplistico’, aunke e tin comprension pa esaki si.

CONFUSION

E intencion di e A.B.B. ta pa elimina e.o. e confusion cu tin aworaki riba e cobransa e.o. di B.B.O y B.A.Z.V. A nota e confusion ora cu a introduci B.A.Z.V. na december, y con ta cobrando esaki robez. De hecho, e mandatario ta admiti cu B.B.O. mes a wordo cobra robes tur e tempo aki tambe. Cu A.B.B., e ta sigur cu esey lo no sosode, debi na su forma mas ‘simplistico’. Contrario na B.B.O., cu ta cobra na varios schakel, ta cobra e A.B.B. solamente na entrada di e producto. Pues un solo biaha ora cu e producto drenta Aruba.

PARTI DI PALET

Mientras cu A.B.B. ta parti di un ‘palet’ di pakete cu ta drenta na vigor na januari otro aña, e la splica e parti aki brevemente. E intencion segun Bermudez, ta pa na fin di april, keda cla cu e consehonan di con exactamente e tarifanan lo ta, y esaki ta varia pues entre 6 cu 8%. A aplica e mesun A.B.B. aki na e islanan BES, unda cu a inicia cu 8%. A resulta cu e cobransa a surpasa e suma necesario, y a baha esaki e ora na 6%. Como tal, ta mas probable cu esaki tambe lo ta 6% pa Aruba. E lo nifica pues cu ta subi e tax cu yama ‘B.B.O.’ awor, pa un ‘A.B.B.’ di 3% originalmente (despues cu a baha esaki pa 1.5% na 2009) te na 6% ora cu aña bolter.