Gobernador Boekhoudt a presenta su discurso tradicional pa Pasco

ORANJESTAD – Diasabra anochi Gobernador Alfonso Boekhoudt a presenta su discurso tradicional di Pasco. Un di e mensahenan cu ta resalta ta cu e miho regalo di Pasco, ta e mannan humilde cu ta yuda carga e cruz di un otro.

E DISCURSO INTERGRAL: 

E miho regalo di Pasco cu mundo a yega di conoce, a bin lora den paña, poni den un pesebre humilde, sin luho, pero un obsekio di lo mas importante simbolisando: amor di famia, calor di esnan cu ta stima nos y e speransa cu ta move tur cos. Cu e nacemento di nos Señor Hesus na mundo, a bin un temporada di Gracia di Dios, cu ta trece salbacion na tur hende. Esaki ta un di e motibonan principal di con hopi di nos ta stima e temporada aki. 

Nos ta reflexiona den e aña cu ta yegando su fin ariba kico amor, paz, harmonia y fraternidad a nifica pa nos. E recuerdonan mas impactante ta bin den nos memoria, di loke nos a experiencia hunto cu nos famianan, nos amigonan y tur esnan cu nos ta stima y tin den nos bida. Nos ta realisa na mes momento con fragil bida y nos entorno ta realmente. Sin cu nos sa, nos ta para keto tambe riba tur e sacrificionan y esfuersonan cu nos a haci pa mantene loke ta mas precioso pa nos. Nos ta contempla riba loke a pone nos curason yena di alegria, pero tambe riba e momentonan cu nos a resigna ora cu nos no por a cambia un situacion.

Aña 2022 ta keda marca como un aña unda nos por a cuminsa wak recuperacion di un pandemia. Nos aeropuerto, nos hotelnan y restaurantnan; nos waf y nos tiendanan, tur a mira cu e bishitantenan cu ta stima nos isla a bolbe na un forma impresionante. Esaki ta haci nos sinti nos mes hopi previlegia di por biba, na e lugar bunita aki cu hopi kier bishita maske ta pa un par di dia. 

Pero e storia aki di recuperacion y gran logro historico ta resumi solamente un parti di e aña aki cu ta casi tras di lomba. Cu gratitud pa nan bida, nos ta recorda e sernan keri y figuranan publico stima, cu e aña aki a bay laga nos. Figuranan cu a sa di uni nos comunidad na nan manera, y nan reconocemento publico tabata permiti nan pa ta e vos pa esunan cu no ta wordo scucha. Nos a haya nos ta despedi mucho lihe, pero lo percura pa tene nan den nos memoria y curason. Un persona ta biba durante su bida, pero tambe den nos recuerdonan.

Door di e situacion mundial nos a mira cu e recuperacion economico no ta yega na tur hogar aki na Aruba. E ta asina bisto pa nos cu un guera cu ta asina leu di nos y cual gran mayoria di paisnan y organisacion internacional ta desaproba, ta afecta mundo henter. Den henter mundo nos ta sinti incertidumbre di loke mañan por trece, y inaccesibilidad di producto y material. Na tur pais na mundo, tur esaki ta trece un spiral fuerte di aumento di prijsnan di consumo, servicionan basico y productonan di prome necesidad. Aruba no ta un excepcion. 

Hende por biba un bida sigur y digno solamente si nan por paga pa e cosnan esencial di bida y nan sa kico ta spera nan mañan. Ta duro pa biba sin preocupacion si cada dia bo mester bringa pa tene un dak ariba bo cabes y lucha pa pone cuminda ariba mesa p’abo y bo famia. Bo mester por cende luz anochi sin tene miedo cu despues bo no por paga pa esey y e lo wordo corta completo. Bo mester por cumpra e cuminda basico, paga huur, y cuenta di awa, sin cu esey ta pone bo cay den un buraco financiero. Ta duro si bo mester scoge entre cuminda of remedi y bo obligacionnan financiero. Echo di no por cumpli cu obligacionnan basico di un famia por pone un persona sinti su mes marginalisa, inferior y ta mishi cu su dignidad.

Nos tur a wak cu ora un sistema ta bou presion di forsanan externo, hopi di su fragilidadnan y deficiencianan ta sali na cla. Sistemanan cu pa añanan largo nos a confia ciegamente riba nan efectividad y fortalesa, y kisas hasta a tuma nan mane algo cu lo tey di mes y pa semper. Sinembargo, ainda e cantidad di hendenan cu no por come cuminda saludabel, pa motibo di e prijsnan cu ta subi, ta creciendo. Ademas, e problemanan di transporte global via di lama tambe ta afecta e seguridad alimenticio.

Nos sistema di cuido medico tambe ta bou di presion enorme pa keda brinda e cuido na tur hende, pero di un manera sostenible y duradero. E shock di e crisis recien y e pasonan tuma pa mitiga e efecto, a afecta cuido y servicionan medico. Esun cu ta depende di un cuido medico continuo pa motibo di enfermedadnan cronico ta biba den un incertumbre. Famianan – principalmente esnan di menos recurso y p’afo di e cobertura di nos seguro medico – no tin un reserva pa ora enfermedad bati na nan porta. Nan lo por cubri e gastonan? Nan lo haya nan mes ta scoge entre cuido medico of necesidadnan basico? 

Cuido social di nos adultonan ta un sector cu tabata bou di presion pa varios aña caba. Durante e añanan tras di lomba esaki a empeora, y ta come na e viabilidad financiero di e instancianan cu ta brinda e servicionan aki. Nos grandinan no sa si nan lo wordo admiti na centronan di cuido of recreacion, si nan mes lo mester cubri gastonan y si nan lo por wordo cuida di un manera debido y digno.

Mescos cu un strea a briya den e anochi scur na Betlehem, anunciando e nacemento di nos Redentor, asina nos tambe por enfoca nos atencion pa e retonan y ta e luz ta unda di incertidumbre, duda y inhusticia. 

Nos tin un responsabilidad special pa cu nos muchanan. Personalmente mi a wak un luz briya, ora cu mi por a guia muchanan den naturaleza pa siña aprecia nos flora na Aruba. Nos tin cu lucha pa cos bay miho pa nan. Nan ta nos presente, y nos futuro. Laga nos fortifica e structuranan necesario pa garantisa nan bienestar. Tambe mi a wak un luz di speransa briya ora cu nos deportistanan a resalta den deporte internacional, ganando medayanan di oro y campeonatonan mundial. Esaki ta ehempelnan di tur talentonan hoben cu tin na Aruba. Nos tin cu sigui fomenta e fe den nos hobennan, cu nan por logra nan soñonan si nan traha duro. Mi a wak un luz briya ora cu un hoben fuerte a landa di Boneiro pa Corsou, pa sostene fundacionnan na Aruba, Boneiro y Corsou, cu ta yuda pashentnan cu cancer.

E mesun lus cu nan ta radia pa yega nan meta, nos tin mester pa afronta e retonan di nos sociedad y pa atende cu e dificultadanan cu nos famianan y esnan mas vulnerable ta enfrentando.

Esaki hustamente ta e mensahe di Pasco: mientras tabata anochi tabatin wardadonan den sabana ta tene warda riba nan tou di carne y nan a wordo alerta pa e luz di e Strea di Bethlehem. E ora un angel di Señor a aperece na nan cu e mensahe di gran gozo. 

Ban nos tambe ta e luz. Ban cuminsa na enfoca riba e cosnan cu nos por influencia den nos esfera personal. Ban ta amabel cu esnan cu nos ta topa riba nos caminda. Bishita un bisiña of famia; wak con ta cu nan. Duna consuelo esnan den dolor. Comparti cu esun cu tin menos. Yuda esnan cu trompica banda di bo, pa nan para bek riba nan mesun pia. Of simplemente ban ta agradecido pa bida ariba su mes.

E miho regalo di Pasco, no ta bin lora den papel cu bunita color, bou di un kerstboom. E ta e mannan humilde cu ta yuda carga e cruz di un otro. 

Laga e mensahe di Pasco aki, encurasha nos pa tene warda riba e tou di Nos Señor. Hunto cu mi casa, Hanneke, y mi yiunan, mi ta desea pueblo di Aruba un Pasco Bendiciona y un Prospero 2023. Cu bo famia sea rondona cu amor, paz y alegria.