Pasenshi di Aruba y Hulanda cabando riba ‘supervision financiero’

ORANJESTAD – Despues di un bay bin entre Hulanda y Aruba di casi 8 luna, pasenshi di un mandatario ta cabando. “E ta absorba mucho energia y capacidad” minister encarga cu finanzas publico Angel Bermudez a confia na NoticiaCla.com. E ta refiriendo na e ‘bataya’ largo entre e dos paisnan riba ‘autoridad di supervision financiero’ di Aruba su finanzas publico. Segun Bermudez, tin un acuerdo riba e ‘normanan’, pero e debate ta keda riba ‘ken y con ta controla esaki’.

DIFERENCIA

Aruba tin su pia fuerte abou, cu e control mester tuma lugar segun e modelo sugeri di un ‘fiscal council’. Hulanda sinembargo, ta sigui insisti pa bin cu e modelo manera e College Financieel Toezicht (CFT) na Corsou y St Maarten. E hecho cu CFT a informa di nan intencion di establece nan mes localmente, no ta conoci pa Bermudez. Y no ta conoci cu e establecimento local di CFT na Aruba tin di haber cu Hulanda su insistencia cu e ta un ‘done deal’. Aruba ta sinti, segun Bermudez, cu e discusion aki mester ta abase di igualdad pa purba yega na un entendimento mutuo cu ambos pais por biba cune. Y e tin cu sosode pronto, segun Bermudez. E no ta dispuesto pa sigui mucho mas riba e topico aki, pasobra ‘e ta kita tempo pa por atende cu e trabounan di belasting’.

DECISION NECESARIO

Despues di tur e tempo aki, Bermudez ta sinti cu un decision mester cay riba e parti di ‘autoridad di e supervision’. Eynan Hulanda y Aruba ainda ta pega y tur dos ta bringando pa nan logra nan meta. “Hulanda nunca a demostra flexibilidad manera cu nos semper lo tabata pensa” e mandatario a admiti. Pero esaki no ta nifica, segun e mandatario, cu nan (Hulanda) no ta dispuesto (pa ta flexibel) segun Bermudez. “Pero nan ta negoshacionnan hopi tough”, e mandatario ta admiti tambe.

PASENSHI HULANDA

Di parti di Hulanda, NoticiaCla.com a compronde cu nan pasenshi tambe ta cabando y cu nan tambe kier pa e asunto aki yega na un resolucion lihe. Nan lo no ta dispuesto pa warda mucho mas, y mientras ta warda riba Aruba su proximo pasonan, no ta sinta keto. Entre otro, a diseña varios scenario caba, cu lo por wordo presenta durante e proximo reunion di conseho di minister di reino fin di luna proximo.