Deaxo Croes ta personahe di aña 2022 di Noticiacla.com

ORANJESTAD – E aña aki Wired Media, e cas di e portal Noticiacla.com, a scohe como su personahe di aña (2022), un persona conoci den e mundo deportivo; e conocido landado Deaxo Croes. Su ultimo hazaña di landa su so, for di Bonaire pa Corsou, cu e meta pa genera fondo pa no solamente un pero tres (3) isla pa e malesa di cancer, a percura pa un momentum bunita na Aruba y alavez crea un bunita union cu e otro islanan pa cu e evento aki. Mientras cu e anuncio oficial tabata te na augustus di e aña aki, pa mas di dos aña Deaxo a uni e tres islanan aki cu su preparacion interno. Y despues di e anuncio, e publico en general a pega cu e chispa di e momento. Aruba a biba e momentonan di preparacion for di e momentonan ey, incluyendo su hazaña na caminda pa e evento di Faro pa Faro na October ultimo, y e evento mes mitar di November di e aña aki. E forma cu e la tene tres isla pareu Aruba, Bonaire y Corsou den tension durante e evento mes na november sigur ta algo di recorda y aprecia. Pa loke ta su persona mes, e forma di preparacion, dedicacion y perseverancia te na final mes ta di admira y por sirbi como un modelo pa hopi hende. Un homber cu tabata dispuesto pa pone su propio bida den wega, pa logra algo mucho mas grandi cu e mes. Y esey, ta hacie pa nos na noticiacla como, e personahe di aña. 

KEN TA DEAXO

Deaxo Croes (43) a nace na Baranquilla Colombia y ta yiu homber di Robertico Croes y Tita Iglesias, y ta studia den Business Administration. Actualmente e ta labora como Account Manager na Aruba Bank encarga cu clientenan comercial. 

LOGRONAN

Mientras cu pa hopi aña e tabata conoci pa su hazañan di landamento riba laman habri y free diving, su prome hazaña internacional cu a dune tambe e prome reconocemento grandi tabata ora cu hunto cu 5 otro landado den e evento Crossing for Hope, Deaxo a cruza laman entre Venezuela y Aruba na 2018 exitosamente landando un distancia di 42.2 km den 10 ora y 23 minuut. E meta principal e tempo ey tabata pa recauda fondo pa Koningin Wilhelmina Fonds.

CROSSING FOR PREVENTION

Pero tabata e aña aki ora cu fin di augustus e la anuncia e hazaña unico aki, Crossing for Prevention cu tabata un landa solo, sin asistencia entre Bonaire y Corsou, y cu e la completa exitosamente cubriendo un distancia di 53.8km den 14 ora y 3 minuut, cu Deaxo a marca e diferencia y establece su mes como e persona deportivo nacional. E biaha aki e meta tabata pa recauda fondo pa tres fundacion, CORESA(Aruba), Kankerfonds (Bonaire) y Fundashon Prevenshon(Curacao).