Bermudez: Banco no mester cobra comunidad “Exchange Tax”

ORANJESTAD – E mandatario responsabel pa finanzas publico, ,-Angel Bermudez-, a keda sorprendi cu banconan a dicidi di verreken e asina yama “Exchange Rate Margin Compensation” impone pa Banco Central, na su clientenan. Esey ta eun compensacion financiero recien introduci pa ley, di banconan comercial pa banco central. Bermudez a confirma na NoticiaCla.com, cu si e tabata sa cu banconan lo a bay haci esey, e lo a percura pa pone un clausula den e ley cu ta evita esey. “E idea no ta cu bo ta pas’e pa bo clientenan” Bermudez a bisa. E ta algo cu, segun e mandatario, ta tipifica e mentalidad di e sector bankero.

NO TA SOSTENE BANCO

E accion aki a bin como sorpresa segun Bermudez, sigur despues cu asociacion di banco (ABA) a sigur’ e cu no lo a bay haci esey. “Diripiente nan a lanta awor y bisa cu nan ta bay pas’e pa e clientenan”. E ta algo cu banconan ta haci pa salvaguardia nan ganashinan. Y como tal e mandatario no ta sostene e accion di e banconan pa cobra e cliente e suma aki. “E (contribucion) ta un encargo cu nan (e banconan) tin cu carga” Bermudez a sigui bisa.

ATIA RABIA

E ta compronde e rabia cu e gremio comercial ATIA a vocifera siman pasa riba e tema aki. “Mi ta compronde pasobra ningun momento so, e tabata algo cu mester a bin den comunidad. E ta un asunto entre banco central y e 4 banconan” Bermudez a bisa.

LEY MES

Segun Bermudez, e ley en cuestion riba su mes no tin nada malo cune. De hecho e tabata algo ‘drumi den lachi’, cu Banco Central a propone pa legalisa un cobransa na banconan local ora cu nan ta cumpra y bende valuta stranhero. Esaki tabata necesario segun Bermudez, pasobra gastonan di supervision di banconan local riba valuta stranhero ta hopi intensivo. Berdad cu banconan ta cobrando e asina yama forex, osea e deviezen provisie, pero esey ta pa gobierno, y no pa banco central. Y awor a bin mustra cu e gastonan ta halto y no ta cubri e gastonan di banco central.

CAMBIA E LEY

E mandatario a sigura NoticiaCla.com cu si e banconan sigui cu e cobransa aki na comunidad y cu e ta trece cierto obstaculo grandi den comercio, y p.e. crea inflacion halto, mester re-evalua ehecucion di e ley aki. “Kizas nos tin cu wak con nos tin cu trata henter e sector bancario” e mandatario a bisa. No por ta asina cu banconan sin mas ta bay cobra tur gasto cu nan haya, na e comunidad.