Sevinger su ultimo palabra: Politica partidista a logra influencia OM pa persigui mi

ORANJESTAD – “Politica partidista a logra influencia OM pa persigui mi”. Asina ex minister y sospechoso principal Benny Sevinger awe diabierna mainta a bisa e hues encarga cu e caso penal Avestruz.  Manera tur caso den corte cu yega su final, den e caso Avestruz esaki no tabata diferente. Y como tal awe diabierna e sospechso principal Benny Sevinger tambe a haya su oportunidad pa hiba su ultimo palabra. Mester menciona mesora tambe si, cu e hues a atende Sevinger atrobe riba e hecho cu e no tabata kier pa Sevinger usa e momento aki pa haci politica den su corte. Y den un pa dos occasion e mester a recorda e ex minister riba esaki durante su discurso. Noticiacla a opta pa dem e relato aki, presenta e puntonan mas relevante pa cu e caso y cu a hala atencion di e discurso aki. 

E ULTIMO PALABRA DI SEVINGER

Sevinger a bin prepara cu un discurso riba papel di varios pagina. E la cuminsa splica cu e y su famia completo tin ya 6 aña bibando cu acusacionan contra dje di contrincantenan politico y Ministerio Publico (e caso Avestruz:red). E la splica con tur dia e ta wordo acusa pa e gobierno y su media di un forma falso. “Tur dia mi tin cu deal cu un prome minister cu no ta laga un reunion den Parlamento pasa sin yama Benny Sevinger pa ladron, corupto y criminal” e la splica hues. Ademas segun Sevinger den e ultimo 4 aña esaki a sosode cu documentonan di e investigacion di OM. “Aparente, (e) fiscalnan tambe tabata participe na creacion di e atmosfera aki”. Despues e la sigui pa cita un declaracion di un fiscal dilanti hues comisario” Mi ta cita: Pa mi, Sevinger ta e hefe di un organisacion criminal grandi. Te hasta ora cu nos caba cu su interogacion, e mester keda cera (den prison) te ora cu su caso bin dilanti. Fin di citado” Sevinger a sigui bisa. 

SOSTEN FAMILIAR Y POLITICO

E la sigui splica con su famia amigo y comunidad a sostene den bon y malo pa cual e ta agradecido pa nan confiansa. E la splica tambe cu te hasta ora cu a kita su derecho activo pa participa den e ultimo eleccion parlamentario, cu tras di trali di prison e la keda eligi cu voto preferencial. 

MANEHO ILEGAL

Segun Sevinger, e no ta den e caso como Benny Sevinger e ciudadano, sino cu segun su contrincantenan politico y OM como minister unda cu nan ta haya cu su maneho como tal (entre 2009-2017:red) tabata contra ley. E la sigui pa bisa cu contrincantenan politico tabatin motibo politico pa bring’e pa esey, mientras cu e otro (OM:red) a sucumbi pa presion politico. “Señor huez, esaki a bira sorpresa di hopi, con politica, politica partidista a logra influencia OM pa persigui mi. Tur pa elimina un contrincante politico”. Den su presentacion completo, e la relata tambe con contrincantenan politico cu awe ta minister a denunci’e y cu e caso a bin dilanti. “Señor hues, mi ta puntra mi mes si esaki ta normal den un pais cu un estado di derecho democratico, unda cu separacion di poder mester ta protehi. E separacion di poder, e trias politica ta existi solamente den teoria”, Sevinger a sigui bisa. Mas citado Sevinger a usa di fiscal, aunke no ta bisa cua fiscal ni na unda esaki a tuma lugar. “Esey ta bisa tur cos” Sevinger a resumi, y sigui” Nos ta piki (detene:red) Sevinger y despues cu un cantidad di recherche y un asortimento grandi di ley, nos ta bay busca algo pa conden’e” Sevinger a sigui cita declaracion di fiscal. E la mustra cu despues di multiple entrada hudicial rond mundo (e la menciona un cantidad di pais) y forma di comunicacion, no a haya nada di e supuesto miyones cu lo e tin riba cuentanan bancario local y internacional. “Tur tabata mentira y cuenta pa crea un ambiente pa mantene e investigacion na bida!”. Segun e ex minister, OM a sigui busca pasobra nan mester a haya algo pa colg’e pensando cu e no por ta un politico honesto y corecto.

FINAL

Na final, e la purba sigura hues cu e la haci su trabou segun su consenshi y honor. Y cu semper e la yuda miles di persona como politico, parlamentario y minister, contrario na loke OM tabata kier a pretende. “ Mi ta para dilanti bo persona, un hues neutral y obhetico, cu lo kere e berdad. Y cu e (e hues:red) lo dicidi riba e caso den un forma honesto. “Mi ta kere den Dios y lo pidi Dios pa ilumina bo persona den e decision cu bo lo tuma y cu bo sentencia, lo por limpia mi nomber” Sevinger a finalisa bisando.