Gobierno a anuncia subsidio pa por microchip cacho domestico hopi barata

ORANJESTAD – Gobierno di Aruba a lansa un campaña pa yuda cu e proceso y registro di e populacion di cacho domestico na Aruba. Minister encarga cu e parti aki, Ursell Arends a anuncia cu gobierno ta subsidia e tarifa di microchip cacho, cu ta nifica cu 5000 cacho por haya un chip pa ‘solamente’ 25 florin, envez di paga e suma completo cu ta entre 60 pa 80 florin cerca un veterinario. Pa esnan interesa, por acudi riba e portal www.arubapetregistry.com y sigui e instruccionan. E mandatario a simbolicamente entrega e prome ‘batch’ di microchip na veterinario Natalie Booi, cu a acepta esaki y gradici pa e esfuerso di gobierno pa yuda cu e problema di cacho. E mandatario a anuncia cu lo reparti e 5 mil chipnan entre e 5 veterinarionan activo riba Aruba, y hunto cu e fundacion di veterinario, lo percura pa haci e operacion aki y asina tin mas cacho registra na Aruba. Asina ta cuminsa un asina yama data base di cacho. E ta beneficioso pa p.e. ora cu e cacho perde pa cualkier motibo, y cu e por wordo identifica facilmente pa medio di un scanner di chip. Tur veterinario, y tambe autoridad policial lo tin un scanner asina pa si ta necesario, scan e respectivo cacho. 

PROBLEMA CU CACHO

Ademas e mandatario a sigura cu lo duna tur atencion na e problematica di cacho di caya, aunke no a bisa nada specifico fuera di lo kier ekipa e departamentonan concerni manera Bureau City Inspector cu e personal y material necesario pa nan haci nan trabou. A admiti di a tuma nota di e critica di Fundacion Parkietenbos un dia anterior riba e keho grandi cu tin pa cu e cachonan di caya aglomera na Dump eynan y cu e peliger cu e ta pa sigur mucha y hende mayor di edad. Pero aki tampoco e mandatario a duna informacion specifico di kico e ayudo ta encera.