Salario minimo lo conoce aumento di 78 florin pa luna

ORANJESTAD – Despues di hopi anticipacion, gobierno di Aruba diaranson a anuncia e aumento exacto di salario minimo vigente entrante 1 di januari 2023. Tabata durante e reunion publico unda cu a trata e cambio di ley di reforma pa aumenta BBO, e mandatario encarga cu finanza Xiomara Maduro a informa cu e salario minimo lo aumenta cu 4.3%. Calculando esaki, di e salario minimo actual conforme e portal di gobierno di Aruba, (AWG 1815,35:red), esaki ta bira un aumento di 78 florin pa luna, of 18,21 florin pa siman. 

ULTIMO AUMENTO

E ultimo aumento di salario minimo tabata 1 di januari 2020, y awor tres aña despues, gobierno ta bolbe aumenta esaki. Notable ta cu e anuncio no a bin di minister di labor Glenbert Croes, sino di e minister colega, cu tabata ‘contestando’ preguntanan y a dal bay pa contesta e pregunta. E la remarca si cu su colega minister Croes lo haci e anuncio ‘oficial’ proximamente. 

ANUNCIO SIN CIFRA

Ta pa varios siman caba cu e portal aki tabata pendiente pa e suma exacto, unda cu e mandatario en cuestion, Glenbert Croes a sigura e portal aki cu e aumento ta un hecho, pero cu tabata wardando e ultimo consehonan pa determina exactamente cuanto esaki lo ta. Por nota cu e colega minister a ‘delanta’ e noticia, porta sin intencion pero cu na final a bira conoci si kico e cantidad ta.