OM: Defensa no a proba cu ex minister Sevinger no a wordo soborna

ORANJESTAD – Ministerio Publico (OM) no ta convenci di inocencia di ex minister Benny Sevinger y su amigo P. Sussebeek. Por lo menos esey nan a mustra y splica diaranson atardi como reaccion riba defensa di e dos sospechosonan principal di e caso penal Avestruz. Den un reaccion cortico pero hopi cla, un di e fiscalnan a sigura cu nan ta keda para riba nan punto cu loke cu nan ta culpa e ex minister y e comerciante di dje entre nan soborno y estafa, ta keda para y cu e defensa no a trece claridad riba e acusacionan. Y principalmente, Fiscal a basa su mes primordialmente riba e pagonan haci entre Sevinger y Sussebeek, y cu no por mustra cu Sevinger enberdad a paga placa bek na Sussebeek. 

PRUEBA

Entre e prome punto cu OM a relata diaranson atardi ta cu, contrario na e defensa di e sospechosonan, algun di e acusacionan haci no a perde nan termino den cual nan mester wordo trata pa evita cu nan ta perde e validez. Defensa a argumenta cu den e caso di cierto di e acusacionan, e tempo pa trata esaki tabata 6 aña y despues di esey no por trata esaki penalmente mas pasobra e termino pa trate, a vence. OM ta pensa diferente y a sigura cu e tempo no a vence y cu e argumento ey como tal no ta valido. 

PROCEDURA PA OTORGA TERENO

A sigui pa e proceso di otorga tereno. Contrario na e defensa di e dos sospechosonan, OM a insisti cu no a cumpli cu e proceso y no tabatin e control debido manera cu ta wordo pretendi. Nan ta insisti cu segun e pruebanan cu nan tin, e proceso no a cana corecto y no tabatin un control debido y cos tabata bay mucho facil. E drempel pa e control y pa haya e opcionan di tereno tabata hopi abou mes. Y ora cu tin asina hopi placa den wega, -OM a referi e.o. nan e suma di 3 miyon cu a wordo gana cu un di e bentanan-, lo no a paga asina hopi si cos lo mester tabata asina facil.

CONTROL DI PAGO 

Un di e puntonan principal di e caso, ta si e ex minister a ricibi regalo den forma di placa, a cambio di servicionan presta. Algo asina ta contra ley y segun OM, contrario na defensa di e dos sospechosonan Sevinger y Sussebeek, e control ta carece. De echo, hopi di e sumanan paga, no ta cuadra cu e supuesto poco pruebanan cu a keda presenta. A mustra cu mientras cu defensa a sigura cu no por papia cu Sevinger a haya pago y regalo pasobra e la paga tur cos bek, falta recibo y kwitantie pa prueba esaki. Cu esaki OM kier men cu no tin (suficiente) prueba cu Sevinger realmente a haci e pagonan bek cu Sussebeek a adelanta pa cierto servicio y producto entrega. “Ni cu e miho intencion, Ministerio Publico no por yega na e conclusion ey” e fiscal a bisa den corte diaranson atardi. 

DECLARACIONAN CONFLICTIVO

Tambe OM a bay riba declaracionan haci y e forma con defensa a contra aresta esaki. Pa OM, hopi di e declaracionan haci den corte, no ta ‘creibel’. Esaki pasobra ora cu durante interogacion a a confronta e sospechosonan cu cierto acusacionan y ponencia, nan reacciona despues ta diferente y no ta cuadra cu otro. 

ADMINISTRACION

Bek pa e asunto di placa, OM a mustra cu ora cu ta trata di transaccionan di negoshi pa persona, mester tin un tipo di administracion funcionando cu ta registra esaki. Y cualkier compania cu ta respeta su mes, mester tin algo asina. Pero falta documentacion pa transaccionan di sumanan grandi. “No ta papiando aki di compra di un rol di drop” e fiscal a bisa den un forma di splica cu no ta sumanan kens ta papia di dje cu a intercambia man, esta e suma kens pa un coi dushi manera rol di drop, sino sumanan gigantesco. “Pa esey bo ta spera un tipo di administracion adecua” e fiscal a finalisa bisando. Y finalmente mirando e situacion di e placanan cu falta di e fundacion di Sevinger, keto bay OM ta papia di ‘estafa’, mirando cu no tin prueba cu placanan importante cu falta, realmente a wordo paga bek.

DEFENSA TA DIABIERNA

Analisando e reaccion di fiscal diaranson atardi, ta mustra cu tur cos ta basa riba e asunto di placa cu a intercambia entre e sospechosonan, cu ta haci e asunto dificil. E punto di bista di OM ta cu si no por prueba cu documentacion corecto y necesario, ta sali for di e punto di bista, cu algo incorecto a tuma lugar, y cu realmente e ex minister a haya placa pa servicionan presta, cu ta nifica cu e ex mandatario y tambe e sospechoso Sussebeek, ta culpable pa estafa y soborno entre otro. Diabierna awor, e defensa di e dos sospechosonan tin cu bin bek y reacciona riba e declaracionan haci awe diaranson, y convence e hues cu realmente (den e caso aki) tabatin documentacion suficiente pa kita tur duda, y of cu e loke OM ta acusa e partidonan, no tin base y cu OM ta purbando di busca y score cu cosnan cu no ta illegal y cu nan ta ‘fout bezig’.