Rapport di DRH y CAD ta mustra cu ta fiesta tabatin na Arubahuis pa basta tempo!

ORANJESTAD – Durante un temporada di investigacion na Arubahuis pa 18 luna, tabatin fiesta na Aruba huis pa loke ta pagonan haci, pero prome cu esey pa loke ta e personal mes, cos simplemente no tabata funciona.  Esey por conclui di e presentacion diamars mainta durante e bijeenkomst riba e investigacion haci na Arubahuis door di Centraal Accountants Dienst (CAD) y tambe di Directie Recurso Humano (DRH). Di 23 persona trahando, 3 a resulta di tabata haci cosnan ‘no normal’ y cu posiblemente lo haya medida disciplinario contra. Asina prome minister Wever Croes a declara den Parlamento. E situacion encontra segun e prome mandatario ‘ta causa berguensa y indignacion’. Y scuchando sr Ronald Pang di Centraal Accountants Dienst (CAD) y tambe sr Wernet di Directie Recurso Humano (DRH), ta fiesta tabatin y tin ainda. Mientras cu a bisa cu e investigacion no tabata riba e minister y representante di Union Europeo, toch a toca hopi riba e ex GevMin (minister plenipotenciario di Aruba Guilfred Besaril). 

DRH

Scuchando un parti so di e presentacion tabata suficiente caba pa haya un idea cu cos ta leu di ta normal na Arubahuis. Cuminsando for di e director cu sea no tey, of si e tey mes, ta poni politicamente sin necesariamente tin e conocemento di e trabou. Consecuentemente e oficina no tabatin un maneho drechi, un vision, entrenamiento y mas. Un desconeccion total den e cas ey unda cu personal no ta papia cu otro, varios ta manera ‘un isla riba nan mes’, no tin avanse, y asina por sigui menciona. Tur esaki a keda presenta pa e representante di DRH sr Wernet diamars mainta durante e presentacion na Parlamento. 

CAD

For di sr Pang di CAD, tambe por a scucha un sin fin di keho, mas tanto relaciona cu aspectonan financiero, basa riba comportacion di e ultimo Minister Plenipotenciario cu tabatin prome cu esun actual. For di uso sin mester di su bancomatico, gastonan di biahe no aproba, un dineral na comemento, pago pa viahamento di famia, uso di cellular y internet na cantidad sin cu tabata presupuesta, gastonan incuri na Aruba paga cu placa di pueblo, sin cu esaki tabata permiti. Tambe tabata gasta placa double, pasobra tabata haya dagvergoeding y asina mes tabata haci gasto extra y mayoria di nan, sin documentacion. Splicacionan di e GevMin no tabata cuadra pasobra segun CAD, ora cu usa placa di pueblo, mester tin hustificacion sin mas y cu documentacion. Segun e representante di CAD, varios di e gastonan no autorisa, e ex gevmin a priminti y a paga bek tambe, manera gastonan di pasashi pa casa. Tur cos ta mustra cu tabatin un fiesta sin control, di top bin abou, y cu a costa pais Aruba basta placa innecesariamente.