Arendsz-Marchena: Den caso di Richardson, OM kier desaproba un accion cu no ta castigabel pa ley

ORANJESTAD – No tabatin ley ni maneho cu ta prohibi of considera benta di accionan den un compania cu opcion pa tereno y considera esaki castigabel. Cu Ministerio Publico (OM) ta desaproba di e practica aki, no ta hacie castigabel. Asina abogado Defensor pa sospechoso R. Richardson, esta Zuhaila Arendsz-Marchena a argumenta diamars atardi den su defensa pa su cliente R. Richardson den e caso penal Avestruz. Richardson ta wordo acusa di entre otro estafa y falsificacion di firma den su calidad como director di e compania Elanath. Cargonan cu su abogado ta considera como un pensamento hopi ‘creativo’ cu OM kier usa asabiendas cu esaki no por. Segun e abogado, OM mes a pensa cu e acto di Richardson lo mester ta castigabel, pero pa cual un castigo no ta existi. 

FALSO

Segun abogado Arendsz-Marchena, OM ta purba construi cu Richardson lo a falsifica intencion durante peticion pa tereno erfpacht entre 2013 y 2014, bisando cu e intencion tabata pa e lo a bay desaroya un proyecto comercial riba e tereno menciona, siendo cu esaki no tabata berdad. E abogado a refuta esaki den corte diamars. Un biaha mas, manera cu otro sospechosonan den e mesun caso tambe a argumenta, OM ta bruha of usa personanan riba titulo personal cu e compania su entitad legal y ta bruha esaki convinientemente. A sigura cu Richardson nunca no a actua riba su mes of titulo personal. Pesey, pakico OM si ta pensa esaki, ta un pregunta grandi segun abogado Arendsz-Marchena  cu a splica e proceso y presenta informacion cu e ta considera como prueba pa esaki entre otro un testigo di fam Tsu. A splica tambe cu durante interogacion di Richardson, semper a mustra cu e la actua como director y no a titulo personal. Cu Richardson tabatin e intencion of no pa desaroya e proyecto su mes, segun abogado no tabata relevante. Aki tambe a usa declaracion di testigonan trahado di DIP cu a splica tambe. E proyecto, segun abogado a keda realisa y como tal Richardson no ta compronde di unda ta saca cu tin informacion falso relaciona cu ehecucion di e proyecto, pasobra a ehecuta e proyecto, tal manera cu a bisa cu e lo a sosode. 

ESTAFA

E otro punto cu Richardson ta cuestiona segun su abogado, ta cu ta acuse di estafa. Estafa ta ora cu un persona manipula cu informacion, duna informacion robez creando un presentacion robez di hechos. Esey kier men cu e persona ta haci algo diferente di loke realmente e la bisa di lo a haci. OM ta sigura, segun e abogado, cu a pone un sin fin di informacion hunto, traha un fantasia y manipulacion sinigual cu kier a bende como e berdad. Richardson, segun e abogado, no por caba compronde ki fantasia y manipulacion OM ta referi na dje. Mescos cu ta den e acusacion di falsificacion, aki tambe, Richardson ta sigura cu a actua como director di e compania Elanath pues no ta compronde ki estafa e lo a comete. Ademas, segun su abogado, cualkier prueba legal y convincente, ta falta den e dossier. Como tal, e abogado ta haya cu mester absolve Richardson tambe di e cargo di estafa. 

NO ADMISIBLE

A base di tur loke a keda presenta, abogado Arends-Marchena, a conclui cu no por haci nada otro cu declara Ministerio Publico inadmissible, y considera e acusacionnan contra su cliente como nulo, y absolve su cliente di tanto falsificacion como estafa.