Gobierno wardando conseho pa dicidi riba decision di Hof riba matrimonio di mesun sexo

ORANJESTAD – Mientras cu gobierno di Corsou a dicidi caba cu nan ta bay cassatie cu e decision di Hof riba admission pa matrimonio di mesun sexo, gobierno di Aruba ta wardando conseho pa dicidi riba e mesun tema. Un comunicado di e departamento di prensa di gobierno a ‘kibra e silencio’ cu a surgi for di e dia cu e sentencia a cay, y a informa e decision pa warda, diamars merdia . E ta recorda cu un siman pasa, diamars dia 6 di December, Corte Superior pa Aruba, Corsou y St. Maarten, HOF, a tuma e decision riba matrimonio di mesun sexo. Despues di a trata un caso entama contra pais Aruba y otro entama contra pais Corsou, Corte a dicta sentencia y ta duna derecho pa parehanan di mesun sexo casa cu otro den e dos paisnan aki. 

“Gobierno di Aruba a sigui e desaroyo aki di cerca y ta en espera di e consehonan huridico di Aruba y di Hulanda, ki paso lo mester tuma despues di e veredicto di Hof di siman pasa. Asina cu e consehonan wordo ricibi, Conseho di Minister lo delibera riba e tema aki y tuma un decision, cu lo wordo comunica na comunidad”.