Obama y Castro programa pa topa awe na Panama

PANAMA CITY  – Awe ta e dia riba cual presidente mericano Barack Obama y presidente di Cuba Raul Castro lo mester topa durante e cumbre na Panama. Prome cu esey, Obama y Castro a papia brevemente na telefon, prome cu Obama cuminsa su biahe pa Jamaica y Panama. Asina e canal di noticia mericano CNN a raporta diabierna. Nan ta cita un fuente den Cas Blanco. E reunion ta e prome desde cu ambos lider a bay di acuerdo pa renoba nan relaciona diplomatico despues di mitar siglo di enemistad. Di parti di Reino Hulandes, Prome minister hulandes Mark Rutte ta lidera e delegacion, y prome minister di Aruba Mike Eman ta invita pa compañe durante e biahe aki. 

YEGADA OBAMA

Obama mes a yega Panama laat diahuebs pa su di tres cumbre di las Americas, cu ta un encuentro grandi cu lidernan latino americano, cu ultimo añanan tabata tenso pa e exclusion di Cuba di e reunionnan aki. Curioso pa raporta cu momento cu e helicopter di Obama a aterisa na Panama City, e avion di Castro a aterisa practicamente mesun momento riba e mesun pista. Canal di television Panameño a transmiti ambos yegada.

KITA CUBA DI LISTA

Un di e declaracionnan mas anticipa di e conferencia, ta cu Obama lo por anuncia e retiro di Cuba for di e lista mericano di paisnan cu ta patrosina terorismo. Ta considera esaki como un paso grandi den proceso pa drecha e relacionan diplomatico entre e dos paisnan. E siman cu a pasa, Obama a ricibi e conseho positivo di su minister di relacionan exterior John Kerry, pa kita Cuba for di e lista menciona. Durante su bishita na Jamaica, Obama a duna un indicacion fuerte cu e lo tabata cla pa kita Cuba for di e lista. Un lista cu ta conta tambe cu paisnan manera Iran, Sudan y Syria. Foto cortesia CNN