Segun Sevinger, si e tabata minister ora caso Avestruz a cuminsa, e lo a retira

ORANJESTAD – Si Benny Sevinger tempo cu e la wordo anuncia como sospechoso den caso penal Avestruz, tabatin e funcion di minister, e lo a retira y hala atras pa duna e investigacion su caminda di cana. Pero como cu e ta(bata) parlamentario e momento ey, e no a hacie. Asina Sevinger a contesta den e programa NoticiaCla LIVE diahuebs anochi riba pregunta di e moderador Tito Laclé. Segun Sevinger, como minister e lo por tabatin e chens di influencia e caso pero no como parlamentario. “Ora bo ta un minister, bo ta den e poder cu bo por beinvloed ministerio publico” Sevinger a sigui bisa. Segun e parlamentario, esaki ta pasobra bo colega ta minister di husticia, bo por influencia e investigacion.

PAKICO NO AWOR

Segun e parlamentario, den e caso aki den su funcion actual e tin zero influencia ariba loke ministerio publico ta haci. E ta referi na e forma con e la keda deteni cu yen di fanfaria. Si e tabata minister, lo a invite pa combersa y no a haci tur e show di yega cu 4 auto di polis y detene na un sitio publico. “Door cu mi ta den Parlamento, mi no ta mira e motibo pa mi por back up caminda mi no tin nada di bisa y por beinvloed e onderzoek”. Ademas, segun Sevinger, e no kier duna e gana na su contrincantenan politico cu segun e, ta drei e tema aki politicamente pa purba di haye for di Parlamento. 

DOÑO DI TRABOU

Ademas segun Sevinger, e ta pensa cu su doño di trabou ta pueblo. Y pueblo a vota p’e mes ora cu e tabata cera den prizon durante eleccion. Esey ta e realidad segun Sevinger. “Sera, mi doño di trabou a bisami cu mi ta bay den Parlamento, y esey mi ta haci. Representa nan den Parlamento” Sevinger a sigui bisa. ‘Dia cu mi doño di trabou bisa ‘tende, mi kier bo ta pafo di Parlamento, nan no ta vota pa mi y mi ta pafo di Parlamento” Sevinger a sigui bisa. 

E CASOE caso mientrastanto ta sigui dialuna awor ora cu abogadonan di sr Sevinger lo presenta nan defensa den e caso penal aki cu ta finalisa fin di otro siman. Si tur cos caba manera mester ta, pa januari 2023 huez por dicta sentencia.