Polis a detene di tres sospechoso den caso di asesinato na ex- Sandbar

ORANJESTAD – En conexion cu e caso di asesinato cu a tuma lugar dia 4 december 2022 dilanti Ex-Sandbar, unda cu e homber di 31 aña Anthony Carty a fayece, recherche di Noord (DAR-2)a detene un hende homber di inicialnan K.K.S.S. naci na Aruba di 17 aña.

Bou guia di Fiscal y acompaña pa Huez Comisario awe madruga a haci un entrada hudicial na un cas na Bushiri y aki a detene e di 3 sospechoso den e caso di asesinato akiriba menciona.

A haci uzo di Team di Aresto pa a aresta e sospechoso. 

Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama e tiplijn: 11141. Polis ta garantisa cu bo ta keda anonimo.

E CASO 

Tabata diadomingo pa mas o menos 1:25am cu Central di Polis a haya informacion cu tabata tin pelea cu a termina cu tiramento na altura di ex-Sand Bar situa na Palm Beach, Noord. Central di Polis a dirigi patruya cu maximo emergencia na e sitio.Na yegada di e patruya nan a haya un situacion caotico y mester a pidi refuerso di mas patruyanan policial. Patruyanan di  Oranjestad, Santa Cruz, Noord, San Nicolas y RRT a bin duna nan colega un man.

Ambulance tambe a yega na e sitio y a hiba un persona cu maximo urgencia hospital. Pero na yegada na hospital dokternan no por a haci muchu mas. Pa 1:36am dokter ta constata fayecemento di e victima Anthony A. Carty naci na Aruba y tabata tin 31 aña di edad.

Full e area a keda cera pa asina e recherche y polis forensico por haci nan investigacion na e sitio di incidente. Un rato despues unidad di RRT a detene un persona na un apartement na Saliña y a confisca un Toyota modelo Vitz pendiente di mas investigacion.