Premier Wever-Croes: Lo trata ley fiscal (e.o. BBO) prome cu fin di aña ainda!
ORANJESTAD - E ley tan comenta cu ta encera e plan di belasting y cu mester adapta e aumento di BBO, a yega Parlamento y lo wordo trata prome cu fin di aña, pa asina tin un cambio fiscal cu ta drenta na vigor 1 di januari. Asina premier Wever Croes a bisa e siman aki. Gremionan ainda tin probleman cu e ley aki pa mas bien su falta di informacion cu tin, y e tempo cortico cu tin pa cu su introduccion, no obstante cu gobierno a sigura cu e ley a inclui ‘proposicionan di gremionan’. Gobierno ta pensa diferente. De echo, aworaki a pidi departamento di impuesto pa cuminsa cu campañanan di informacion hopi mas intensivo comunidad ta informa tocante tur locual tin den e plan fiscal, cual ta inclui proposicionnan di gremionan.
CONTACTO CU GREMIONAN
Contrario na loke gremionan ta bisa, ya pa algun tempo gobierno tin contacto cu gremionan, pa cual ta importante pa menciona cu Departamento di Impuesto a tene cuenta y evalua e preocupacionnan cu a wordo treci dilanti door di gremionan. Ademas a ricibi documento di gremionan cu yama ‘Level Playing Field’ den cual nan ta haci proposicionnan pa cambio fiscal. Pa loke ta e preocupacionnan, no ta tur cos por a tene cuenta cu ne, pero e gran mayoria si a wordo teni na cuenta den e cambionan cu a bay Parlamento.
REUNION
Prome Minister Evelyn Wever - Croes a splica cu mientras cu tabata trata e reforma fiscal tabatin un reunion cu gremionan conhuntamente cu ATIA. Na e ocasion gremionan a expresa hopi preocupacion cu e introduccion di BTW. No tanto pa e BTW mes como cu ta di acuerdo cu e ta un bon belasting pa Aruba, sino pa motibo cu e ta un cambio grandi cu tabata tin cu drenta na vigor dentro di algun luna y tambe pa motibo di e efecto inflatorio cu ta afecta Aruba severamente. Segun gobierno, ta e gremionan mes a pidi pa no introduci BTW 1 di januari 2023, y algun a hasta propone pa hisa BBO na luga di introduci BTW. Consecuentemente, a bay bek y haci e siguiente calculacion: Si hisa BBO cu 1%, su efecto inflatorio ta hopi mas abou cu si bin cu BTW 1 januari 2023, pero e efecto financiero ta igual. Considerando e insiguridadnan cu tin cu e guera na Ukraina, crisis di inflacion y preocupacion di gremionan, a tuma e decision pa pospone introduccion di BTW y enbes di esaki ta hisa BBO.
ATENCION DI DIMP
Prome Minister Wever - Croes a sigui bisa cu un otro punto treci dilanti den e reunion ta cu, gremionan ta di opinion cu Departamento di Impuesto no ta pone suficiente atencion na cobra esnan cu no ta pagando of contribuyendo manera mester ta, entre otro esnan cu ta haciendo negoshi manera Airbnb. Teniendo esaki na cuenta a dicidi pa bin un proyecto specialmente pa atende cu e parti aki y compliance.
Banda di esaki, Prome Minister a splica cu ora cu tabata considerando introduccion di BTW, Gobierno kier a bin cu dos tarifa, uno abou pa utilidadnan y comestibel, y uno halto pa tur otro cos. Sinembargo e critica cu gobierno a ricibi ta cu e lo bira mucho complica y pa mihor bin cu un tarifa so. Aworaki cu a pospone introduccion di BTW, e ta bay duna mas chens pa calcula mihor kico e efecto ta bay ta y si berdad ta mihor pa bin cu un tarifa so.
LEVEL PLAYING FIELD
Un otro peticion cu gremionan a haci ta pa bin cu un ‘level playing field’ y bin cu un BBO na frontera. Loke cu comerciantenan a bisa ta, ora cu nan importa algo pa bende, nan ta paga invoerrechten y ora cu nan bende esaki nan ta paga BBO. Pero si un persona importa un producto for di por ehempel amazon.com, nan ta paga solamente invoerrechten y no BBO. Asina a bin cu e decision pa bin cu un BBO na frontera cual tambe ta bay ta den e plan fiscal. Sinembargo esey no lo por drenta na vigor 1 di januari 2023, pasobra e departamentonan tin mester di tempo pa adapta na dje, pues e ta bay drenta na vigor 1 di juni. Finalmente Prome Minister a expresa cu mayoria di e puntonan treci dilanti door di gremionan a wordo teni na cuenta y atendi cu ne. A haci e peticion, e departamento di impuesto pa comunica esaki debidamente pa tur hende sa kico ta locual cu tin den e plan fiscal.
Agencianan di Nacionnan Uni a reuni cu GO'S y NGO'S na Aruba pa contribui na nos progreso
ORANJESTAD - Agencianan di Nacionnan Uni a reuni cu GO'S y NGO'S na Aruba pa contribui na nos progreso. Ta trata di representanten di por lo menos 9 agencia cu ta na Aruba pa reuni cu Gobierno, departamentonan publico y semi-publico y NGO's nan. E meta di nan bishita ta pa scucha kico ta e necesidadnan di pais Aruba y unda nan lo por asisti den implementacion di diferente proyecto.
Minister Wever: Pabien Setar NV cu 20 aña di innovacion, progreso y exito!
ORANJESTAD – Minister encarga cu TElecomunicacion, Geoffrey Wever a manda felicitacionan pa empleadonan di Setar NV na occasion di e 20 anniversario. “Mi kier extende mi caluroso felicitacion na empleadonan di Setar NV, pasado y presente, cu celebracion di 20 aña di Setar NV! Como un actor clave den industria di telecomunicacion na Aruba, Setar NV semper a hunga un rol fundamental den avansa e paisahe tecnologico di e isla, y tambe semper a contribui cu comunidad” e mandatario a bisa.
Representantenan di 9 agencia di Nacionnan Uni ta na Aruba pa asisti cu programanan
ORANJESTAD - Ta prome biaha den historia di Aruba cu un delegacion asina grandi di Representantenan di organisacionnan di Nacionnan Uni ta di bishita di trabao na Aruba. Esaki net despues di e bishita di e famia Real. Un siman hopi activo y un otro siman mas di hopi importancia.
Gobierno a firma acuerdo cu ELMAR pa instala camara di seguridad riba rutanan di carnaval
ORANJESTAD - Diahuebs mainta, Minister di Husticia Rocco Tjon a firma un acuerdo cu Elmar N.V. pa hacie posibel pa por ekipa ambos ruta di carnaval, esta esun di San Nicolas como tambe esun di Oranjestad, cu camaranan di seguridad. Ta trata di un proyecto piloto inovativo, mirando cu nunca antes esaki a wordo haci, cual ta un metodo sumamente di balor agrega pa cu Cuerpo Policial.
Sociaal- Economische Raad (SER) ta propone amplia verlof di paternidad
ORANJESTAD - Sociaal- Economische Raad (SER) ta propone amplia verlof di paternidad. Asina minister di economia Geoffrey Wever a informa diaranson atardi. Segun e mandatario, e hende homber cu bira tata tin derecho riba dos dia di verlof di paternidad segun ley. Den su ultimo conseho na gobierno, Sociaal- Economische Raad ta propone pa amplia e cantidad di dos pa cinco dia di verlof di paternidad.
Minister Tjon:Tourism Security Patrol (TSP) cu ayudo di AH&SF lo bira un realidad
ORANJESTAD - Diamars mainta, a tuma luga e conferencia di prensa di Aruba Tourism Authority (ATA) y Aruba Hospitality & Security Foundation (AH&SF) caminda a toca diferente puntonan pa loke ta siguridad den e area hotelero, pero a toca specificamente e proyecto nobo, esta e “Tourism Security Patrol” (TSP), cual awe a firma un acuerdo entre e socionan cu ta forma parti di esaki, incluyendo KPA, pa asina amplia e vigilancia den area hotelero.
Follow NoticiaCla
