Aruba hayando atencion internacional danki na cobertura pa futbolista hulandes Denzel Dumfries

DOHA – E siman aki a habri cu hopi cobertura ‘indirecto’ y directo pa e isla di Aruba, danki na e atencion cu e hungador di futbol pa seleccion di Hulanda na mundial di Qatar 2022, Denzel Dumfries ta hayando riba su mes. Specialmente despues di su prestacion diasabra durante e wega entre Hulanda y Merca durante e mundial, unda cu Dumfries a asisti dos biaha pa anotacion y finalmente e mes anota e di tres goal di e partido di Hulanda contra Merca. Noticiacla a conta por lo menos 10 pa 15 recorte periodistico internacional unda cu Dumfries ta haya atencion particular y mencion, y cu ne e hecho di su lasonan cu Aruba, sea ta pa su participacion breve den e seleccion di Aruba hopi aña pasa y pa e hecho cu un di su mayornan cu ta di Aruba. Pero hasta prome cu e weekend aki, durante tur e weganan cu Hulanda a hunga, por a scucha comentaristanan internacional haci mencion di  Dumfries y relate mesora cu ‘pais Aruba’. 

VARIOS IDIOMA

Den varios idioma, y varios pais a dicidi di duna atencion na Dumfries, papiando di su prestacion, pero tambe di e storia di cu den pasado a hari Dumfries ora cu e tabata papia di su ideanan pa forma parti di e seleccion hulandes, unda cu su coleganan di e tempo ey a hari’e, y awe e ta haya razon. E mesun coleganan cu e tempo ey a hari’e, awor ta conta nan storia y ta dune razon. E combinacion di e storianan ey, a pone Dumfries riba e panorama internacional aki, unda cu hunto cu ne, Aruba su nomber pues a luci internacionalmente, dunando nos un cobertura internacional impagabel.