Rene Herde: Comision original lo a haci miho trabou cu CFT

ORANJESTAD – Considera dialuna, como un dia hopi interesante, lider di fraccion di partido AVP Rene Herde ta yega na e conclusion cu “si a forma e comision original hunto (experto Aruba y Hulanda), lo a haya mesun rapport, pero probablemente miho raport cu nos a haya ayera”. Herde ta sigura cu su partido a repasa e rapport y a duna un reaccion breve.

Por a evita tur problema cu a surgi siman pasa, Herde ta mustra, si a sigui e paso diferente cu AVP kier a tuma. “Lo a evita e protesta pasivo di prome minister” Herde ta sigui bisa. A referi na e polder model di Hulanda, cu Hulanda mes a pone un banda. “Tristo pa constata cu tur e problemanan por a wordo evita. E rapport y reaccion ta confirma esey”. E rapport, segun Herde, pa otronan lamentablemente no a trece nada nobo. “Tur e informacion den e rapport tabata disponibel pa tur instancianan financiero segun Herde, (IMF, S&P, Fitch etc). No tabatin nada scondi” e lider di fraccion a sigui bisa. “Nos mes na Aruba a haci nos mes asina ridiculo cu ta tristo. Tur esaki por a wordo evita”.

Loke e rapportnan internacional ,-segun Herde-, semper ta mustra, pero cu e rapport di CFT no ta mustra, ta e aspectonan socio economico. E ta referi mesora na e hecho cu e mesun CFT den un rapport di Corsou y Hulanda si a mustra esaki. Riba insistencia di NoticiaCla, a mustra cu enberdad porta e rapport final aki 6 siman si ta mustra esey.”Mi ta spera cu si” Herde a reacciona bisando. Loke pa Herde falta, ta e mencion di economia, ya cu e realidad di bida ta cu tur cos ta draai rond di economia.

E lider di e partido berde, a haci un esfuerso grandi, refiriendo na varios rapport, programa di partido, pa mustra cu e loke cu e quick scan a mustra, no ta nada nobo, y cu gobierno ta na altura y ta actuando corectamente caba. Sin cu un rapport di CFT mester a demostra esey.