Croes (ATA): Lo reactiva Visibility Team den 2023

ORANJESTAD – Aruba ta bay reactiva e asina yama Visibility Team pa 2023. Un team cu ta activo pa cu seguridad mas bien den e sector turistico. E idea a bin dilanti caba for d 2019 cu e tempo ey ex minister Andin Bikker, den un comentario na e portal aki, noticiacla. Pero awe mainta tabata durante un conferencia di prensa pa anuncia un proyecto di turismo, cu e CEO di ATA, Ronella Croes e biaha aki a comenta brevemente riba e suseso tragico di fin di siman unda cu un asesinato a tuma lugar den pleno zona turistico diadomingo marduga. Aki e la anuncia cu tin den tapara, pa reactiva Visibility Team otro aña. “Seguridad ta keda un prioridad pa nos comunidad pero tambe pa nos sector turistico” Croes a  cuminsa na bisa. 

REACTIVA VISIBILITY TEAM

Croes a mustra cu di parti di ATA lo sigui enfoca riba su contribucion na seguridad pa medio di e Aruba Hospitality & Security Foundation. Y ta aki cu e la menciona e reactivacion di e team menciona. “Un proyecto cu mi ta kere cu a resulta hopi bon den pasado, y cu nos lo bay reintroduci na 2023, ta e reintroduccion di e visibility team” Croes a bisa. E ta sigura cu esaki ya caba tabata den planificacion conhuntamente cu ministerio di turismo e.o, KPA y tur otro cu tin voz den e hunta di AH&SF. “Esaki ta parti di e planes pa 2023” Croes a bisa. E ehecutivo no a specifica ki tempo di 2023 lo reactiva e visibility team. 

PASADO

Tabata na 2019 ora cu e tempo ey minister di husticia Andin Bikker a anuncia e reactivacion di e Visibility Team na e portal aki, ora cu e portal aki a puntre riba e reto pa bin cu e team, si un di e problemanan di KPA tabata ‘escases di personal”. A puntra e (awor ex) mandatario e tempo ey riba e escases di polis (falta 220 polis) y con ta bay haci cu e Visibility team nobo si no tin polis. E (awor ex) mandatario a bisa cu tin cu separa e’tekort na polis’ cu e ‘concepto di visibility team’. 

VISIBILITY TEAM ANTES

E visibility team antes tabata un cooperacion di sector comercial y publico , unda cu e fundacion AHSF Ariba Hotel & Security Foundation tabata envolvi. Den e direccion ey e awor ex minister di husticia tabata pensando segun su reaccion pa e portal aki. Normal ta aloca cierto miembro CEA, KPA cu ta patruya conhuntamente cu boluntarionan of personanan cu ta riba payroll di e security foundation. Algo asina lo tin cu bin bek atrobe segun e ex mandatario abisa. Tabatin retonan financiero, pero toch ta haciendo lo imposibel pa logra trece e caso bek. “Nos lo sobresali y surpasa e retonan aki” Bikker a sigura e portal aki e tempo ey. Awe mainta nos ta tende un biaha mas cu awor ta na 2023 e visibility team lo ta bek. NOTA. E potret ta uno di archivo di Noticiacla di 2016 tempo cu Visibility team tabata activo ainda.